KUCHING: Muzium Borneo Budaya deka mandangka daya idup komuniti Sarawak ti tebilang ngembuan bemacham budaya.

Direktor Muzium Sarawak, Tazudin Mokhtar madah, penumbuh muzium nyadi bukti Perintah Sarawak ti teulihka runding numbuhka muzium beteknologi tinggi udah tejapai.

Pia mega ku iya, pengawa muka muzium baru nya udah matak minat komuniti lebih agi komuniti Tanah Kenyalang ti tebilang enggau semangat sayauka muzium nyentuk muzium lama nyadi ikon mengeri Kuching.

“Ba taun 1998, ex-Kepala Menteri niang Pehin Sri Adenan Satem mega bisi ati berandau pasal muzium kompleks enggau nyendiaka siti muzium besai tang enda tejapai nyentuk muzium tu ditumbuh.

“Lalu lebuh muzium tu disikap manah ngena teknologi baka ‘touch screen’ enggau galeri anak mit ngujungka penyelai muzium kitai sama baka di Eropah,” terang iya.

Ngelansa pasal muzium baru nya, Tazudin madah, begunan lima ringkat pemesai 60,000 meter persegi nya ngembuan pematak kediri empu ba tiap ringkat.

“Ambika banding, ba ringkat tiga pasal daya idup, pemanah rampa menua tauka pengawa asal ti nempa daya idup kitai.

“Ba ringkat empat, pasal sejarah lalu bisi mega mandangka adat asal iya nya sejarah Sarawak bekaul enggau deklarasi Sarawak Merdeka enggau Sempekat Malaysia 1963 (MA63).

“Ba ringkat lima, mandangka keresa enggau pesaka asal bekaul enggau komuniti ditu empu lebih agi komuniti Orang Ulu baka manit,” terang iya.

Tazudin mega madah, muzium Sarawak nya entara muzium ti ngembuan koleksi pemadu besai di Malaysia.

Ku iya, entara keresa lama ke bisi ba muzium tu iya nya bemacham seramik baka tajau, mangkuk, pinggai, pirin enggau ke bukai.

Nya alai, Tazudin pechayaka pengawa muka muzium tu deka nerima timbal ke chukup mayuh laban mensia mayuh suah betanya kemaya begunan nya deka dibuka ngagai mensia mayuh.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak