MIRI: Nembiak nadai surat beranak dikemendar besekula enggau mesti nunjukka bukti sida udah minta nyadi peranak ari Opis Menteri Dalam Menua (KDN).

Menteri Pemansang Orang Indu, Anak Mit enggau Pengintu Pengelantang Komuniti, Datuk Seri Fatimah Abdullah madah, rugi enti anak mit beumur empat ngagai lima taun nadai diberi pelajar tumu.

“Kami udah minta Opis Menteri Pelajar Malaysia (KPM) ngemendarka nembiak tu besekula laban sida udah minta surat beranak,” terang iya ngagai pemberita, kemari.

Ku Fatimah, KPM mesti berundingka pekara nya ngambi nembiak tu besekula enggau nunjukka bukti sida bisi dokumen minta surat beranak ari KDN.

“Sida mesti nunjukka bukti baka lumur rujukan ti diberi KDN enggau Opis Pengerejister Bansa (JPN), penatai sida ba Sarawak sekalika rikod sekula, rikod pengerai enggau ke bukai,” terang Fatimah.

Terang iya, KPM bisi kuasa ngaga pemutus sekalika ngemendarka nembiak nadai surat beranak nya besekula tauka enda.

“Bisi apai indai ulih nganjung anak sida ngagai sekual peribit tang bisi nya enda ulih.

“Enti bisi atur mesti bisi kad nembiak, nyau naydi isu baru ga nya ke deka ngemediska sida laban mesti minta passport enggau begunaka belanja bukai.

“Nya kebuah, kami minta KPM ngemendarka nembiak tu ari kategori anak ambu, anak ibun enggau anak nadai dikenuku taraf dikemendar besekula dulu seraya nganti pemendar nyadi peranak ari KDN,” ku iya madah nyemetak.

Dulu ari nya, Fatimah betuaika Aum Komiti Khas Status Peranak 15A (JKSK15A) Renggat Nengeri Sarawak Bilangan 1/2022.

Ku iya, bisi 73 peminta udah dibantai ngagai JKSK15A enggau 45 peminta ari kategori anak enda dikenuku taraf, kategori anak dijaga (15 peminta) enggau kategori anak ambu (13 peminta).

“Sehari tu (kemari), kami nyuaka surat pemutus peminta nyadi peranak di baruh Perkara 15A Perlembagaan Persekutuan ngagai enam iku ke diau di Miri.

“Bisi 14 iku agi udah bulih pemendar ari Menteri Dalam Menua tang semina enam iku ke bisi datai,” terang iya baru.

Nangkan nya ku Fatimah, proses peminta nyadi peranak di baruh Perkara 15A enda ngelui timpuh dua bulan bepun ari minta, ngagai JPN Sarawak, udah nya dianjung ngagai KDN enggau seterusnya JKSK15A.

Taja pia ku iya, semina Menteri Dalam Menua bisi kuasa ngemendarka peminta ke udah abis diisi.

Sama datai Sapit Menteri Pemansang Orang Indu, Anak Mit enggau Pengintu Pengelantang Komuniti ke mega Adun Bekenu, Datuk Rosey Yunus.

TERIMA KASIH… Fatimah nyuaka surat pemutus nyadi peranak ngagai siku penerima seraya dikemata Rosey Yunus di Miri, tengahari kemari.

Suara Sarawak