KUCHING: Semua penupi jelu mesti bisi perengkaguna baka ‘vuhicle dip’ tauka ‘foot dip’ nyengkaum pagar perimeter ti tegap ungkup biosekuriti ba kandang jelu tupi.

Menteri Betanam Betupi Moden Enggau Pemansang Kandang Menua Datuk Seri Dr. Stephen Rundi Utom madahka pekara nya bekau ari penyakit ‘African Swine Fever’ (ASF) ti ngerekai di sekeda dandang jani di Sarawak.

“Penupi jelu mesti ngelala kelai rampit ASF baka mati ngenyit ti beraban, jelu tabin, jelu pedis enseput, bisi kelai mirah tauka kembai ba kulit jelu, enggai makai, lumbu, mutah, chirit, kembai kaki, kulit bakal (ulser) enggau idung jelu pansut ai.

“Nyema penupi jelu meda kelai tu, sida patut terus betelefon ngagai Opis Servis Vaterinar ti semak awakka penyakit nya enda ngerekai,” ku iya dalam siti penerang media, kemari.

Ku iya, penupi jelu ulih ditinggang ukum enda lebih ari RM500 dibaruh Seksyen 32-(2) Ordinan Kesihatan Awam Veterinar 1999 nyema enda ngeripotka kes rampit AFS ngagai raban bekaul.

Nangkan nya, iya madahka penupi jelu ti muai bangkai jani ba palan ti enda tau kelebih agi parit, pegung ai enggau jalai mensia mayuh mega ulih ditinggang ukum enda lebih ari RM1,500 dibaruh Seksyen 12-(2) Control of Livestock Farming Rules, 2003.

“Nya alai, raban penupi jelu mesti meratika semua chara nagang pengerekai penyakit nya awakka pengerai jelu tupi dijamin,” ku iya.

Rundi mega madahka, taja pan penyakit ASF nya bisi ngerekai tang bekal dagin jani di pasar maya diatu likun diempa.

Suara Sarawak