Agustina Sali Pani

Agustina Sali Pani, 26 suah agi dikangau nama Pani siku penanyi Iban ari menua Kalimantan Barat (Kalbar), Indonesia chakah merindang kenyau ari taun 2017.

Penanyi ke ada kena 31 Ogos 1996 ba Nanga Sebintang di Kapuas Hulu, Kalimantan Barat tu anak tuai ari tiga diri menyadi.

Pani dikelala ba menua nya pengudah iya menang bulih gelar Dara Intellegensia ba Pekit Bujang Dara Pelilih Sintang dalam taun 2017.

“Aku berengkah nyadi penanyi maya aku beumur aku 21 taun iya nya pengudah aku menang lalu bulih gelar Dara Intellegensia ba Pekit Bujang Dara Pelilih Sintang 2017.

“Ari nya, nama aku majak pegari ngujungka aku suah nerima kangau merindang ba mayuh pengerami.

“Udah nya, aku dikangau nyemilik kompeni A Star Man Production House,” ku Pani ngelansa pasal pemungkal pejalai iya ba dunya pemerindang.

Nusui pasal pendiau diri sebilik, Pani madahka indai iya endang endang tulin bansa Iban.

“Lagu tauka muzik dikena kami nadai jauh bida ari kelia, tu dikena kami ngetanka penulin rentak muzik tauka budaya Iban ditu (Kalbar),” ku iya.

Ngenang pasal timbal ari peminat, Pani madah lagu Iban endang agi tubah dikerinduka peranak di menua Kota Sintang.

“Genap kali bisi pengerami endang lagu Iban belama dimain kami.

“Tu ukai reti iya aku madah lagu bukai enda manah, tang nya mih, ketegal penyelai ti bisi ba genap genteran leka jaku enggau muzik ti agi mandangka budaya idup asal bansa Iban.

“Nya alai, aku seruran ngerikod lagu Iban nyentuk ke diatu,” ku penanyi bekulit burak, peninggi 151 Sentimeter (CM) sereta rindu nginti enggau meda movie.

LAGU TERUBAH DIRIKOD

Agustina Sali Pani

Lagu Iban terubah dirikod Pani diberi nama Gauk nyeritaka kisah apai enggau indai ti balat lelengau deka betemu enggau anak seduai iya tang enda mujur laban sekula alai anak seduai belajar kelalu jauh di mengeri.

Lagu Gauk ke disadaka Pani dikeluarka Serikat A Star Man.

“Apai enggau indai dalam kisah lagu tu semina ulih berandau enggau anak ngena telefon aja,” ku Pani.

Udah nya, ngelansa pasal lagu Iban pemadu baru Pani madah iya bisi ngembuan siti lagu genre Pop Ballad diberi nama Terima Kasih Sulu.

Nuju bala menyadi di menua Sarawak enti kita deka ninga lagu Iban Terima Kasih Sulu ari aku tu, kita ulih meda ba Channel Youtube Pani Official, ku iya.

Pani madah leka lagu Terima Kasih Suku nya endang ditengkebang iya empu enggau bakih iya Eka Poetra.

Lagu nya ku iya, nyeritaka pasal dua iku lelaki enggau indu ti benung bepangan tang diau jauh ari pangan diri.

“Taja pia, pengerindu ditanggam seduai iya tetap meruan baka selama, semampai bisi betanya rita ngagai pangan diri.

“Nya alai, indu nya tadi ngasaika diri chukup betuah ngembuan siku sulu ati ti seruran kiruh, mereti sereta semampai ibuhka iya.

“Kebendar mega, lagu tu bisi mangka pengidup aku dikena aku nusui pemanah siku lelaki ke pemadu disayau aku, ngenang pementas iya sekumbang udah besulu enggau aku, ku iya.

Pani mega siku penanyi ke landik bemain gitar benung nembuka tiga buah lagu Gawai 2022.

Kelimpah ari lagu Iban, Pani mega bisi nyadaka lagu ba jaku Dayak Lebang dikumbai Napat Jodoh enggau Nyambut Temuai sereta sebuah lagu jaku Dayak Kanayant dikumbai Reponya Ati Ku.

Suara Sarawak