MANAH…Patrick Gani mandang siti ari model kapal ke udah tembu digaga.

Munyi ku leka lagu, ‘enda landik ditunjuk jari ulih ga nyadi tauke besai’ dikena ngading enggau nerangaka pengawa siku anak Iban ti endang ngembuan penau sereta pengelandik begagaka keresa ari kayu, Patrick Gani Ajak madahka pengawa ngaga kapal kayu udah meri asil ti manah ngagai penatai pemisi iya sekalika nya dibeli penguna nyadi tepa tauka ayam pemandang.

Peranak asa menua Sibu tu madahka diri sigi rinduka begagaka utai ari kayu senipak enggau pengelandik ba ke diberi Petara ngagai iya.

“Aku rinduka pengawa begagaka keresa ari kayu laban suba aku bisi kala belajar ngaga pelin tauka nero kapal tang enda mujur.

“Maya nya suba aku bisi penanggul ba senentang belanja dikena aku bebayar belajarka kus tu,” ku Patrick Gani lebuh dirandau pengari Suara Sarawak, apin lama ke udah.

Nangkan ke nya, iya madah udah bejalaika pengawa ngaga kenyau ari tiga taun tu ke udah iya nya belabuh ari Atur Mindah Betagang (PKP 1.0) suba lalu nyentukka sehari tu.

Ba pengawa ngaga model kapal kayu tu, Patrick madahka iya endang semampai nerima sukung sereta peransang ari apai indai, bini iya enggau kaban belayan ke bukai.

Patrick Gani Ajak

“Pia mega Kapten William iya nya siku ari petunggal aku ti gawa ke tasik ti balat amat meri jaku sukung enggau tunjuk ajar ngagai aku begunaka chara kena ngaga promosyen ba media rama baka Facebook dikena mandangka asil utai ti ditengkebang aku,” ku iya nusui sapa orang ke nyadi tulang belakang balat nyukung enggau meransang iya ngaga ayam nya.

Lebuh ditanya nama model kapal keterubah digaga iya ngena penau pengelandik jari ti digaga iya ari kayu, Patrick madahka iya ngaga tugboat.

“Aku ngaga tugboat tu suba dikena ngepun enggau aku nguji ngapa lalu enda nyangka bisi nerima sambut ke chukup manah ari orang mayuh ke udah meda utai digaga aku” ku iya.

Patrick mega nerangka model kayu ke suah dikena iya ngaga tugboat, tongkang barge enggau kapal thanker iya nya bansa pine wood sebansa kayu ti diimport ari menua Austria.

Iya mega madahka, enti iya ngaga ekpres baru iya begunaka kayu bansa engkabang iya nya kayu ti bisi ba menua kitai empu lalu penatai kayu tu dibeli ari sumil kaban iya empu.

TIMBAL TI MANAH

“Aku mega bisi ngaga begagaka kapal, crane enggau mega piko tang ke mayuh agi ke suah digaga aku iya nya kapal ti semampai nerima peminta ari orang ke meli.

“Bansa keresa ke udah digaga aku iya ke mayuh udah dibeli orang iya nya tugboat enggau landing craft thank (LCT),” saut Patrick lebuh dirandau pengari Suara Sarawak senentang ni bagi bansa keresa ke suah dibeli orang ari iya.

Iya mega madahka, naka tu timbal ari orang ke meli keresa ke digaga iya chukup manah lalu ngasuh ati majak ransing ngaga model kapal nya taja lelak tang enda berasai ketegal minat.

LANDIK…Sekeda model kapal kayu ke udah tembu digaga Patrick.
LANDIK…Sekeda model kapal kayu ke udah tembu digaga Patrick.

Tang ku iya bisi sekali model kapal ke digaga iya dibeli siku pemeli ari menua Sabah patah laban bisi penanggul ba perengka pengangkut taja udah dibungkus enggau chukup meruan lalu Patrick arapka pekara tu enda nyadi agi.

“Rega utai digaga aku endang nitihka pemesai lalu chunto iya baka sida ti deka meli tugboat ti besaiz 1.6 kaki ti berega RM950.

“Ti dua kaki rega iya semina RM1200 lalu ke pemesai 2.8 kaki RM1500 pia mega enggau rega utai ke bukai ti digaga aku endang nitihka pemesai,” ku iya nyebut chunto rega utai digaga iya.

JULUK ATI

Patrick mega madahka diri bisi ngembuan dua iti juluk ati ba pengawa iya begagaka model kapal ngena pengelandik jari iya.

“Juluk ati aku keterubah iya nya deka bisi mesin tauka kereban ti chukup dikena gawa.

“Lalu juluk ati aku ke lumur dua iya nya ngarapka mayuh agi mih bala pemeli ngudar ayam ti digaga aku jemah ila,” ku iya nerangka juluk ati diri.

Patrick mega sempat meri tibar jaku peransang ngagai orang bukai tauka raban nembiak rebak baru ke bisi ngembuan penau enggau pengelandik diri kelebih agi ti ngembuna minat ke sebaka enggau iya.

“Anang takut nguji lalu anang malu mantaika pengelandik diri baik ke nya dalam pengawa kraf jari tauka pengelandik ke bukai ambika kitai semampai berani ngayanka pengelandik kitai lalu semampai ubah mega chara berunding awakka pengelandik pulaika pemaik ngagai diri empu enggau diri sebilik,” ku lalau Patrick.

Barang sapa bala ke deka meli ayam digaga Patrick Gani Ajak, tau betelefon terus ngagai iya ba lumur 010-2028242 tauka ba Facebook Patrick Gani Pat.

KREATIF…Patrick benung betukang ngaga model kapal.

 

LANDIK…Sekeda model kapal ke udah tembu digaga Patrick.

Suara Sarawak