SARATOK: Pemujur pengawa raban nyaga pengelikun orang periman baka raban Polis DiRaja Malaysia (PDRM) bepanggai ba kerejasama semua raban.

Sapit Menteri Pengeluar Kuasa enggau Pengeraja Asal, Datuk Ali Biju madahka nya setipak enggau rambai jaku enggau tuju Ngerami Hari Polis Ke-215 taun tu.

Ku iya, kitai mesti sedarka empas enggau pemesai reti rambai jaku ‘Polis enggau Komuniti Enda Beselara’ nya.

“Kitai nemu, taja pangku pengawa nyaga pengelikun menua telempai ba tandan bau PDRM, tang sida begunaka kerejasama semua kitai maya gawa.

“Nya alai aku arapka semua kitai nemu tanggungpengawa diri empu ngambi menua kitai semampai likun enggau lantang endur diau,” ku iya.

Ali ke mega Kaban Parlimen Saratok nibarka jaku nya lebuh dipebasa bejaku ba Pengerami Ngintu Hari Polis Ke-215 Renggat Pelilih Saratok, pagi tadi.

Iya meri besai terima kasih enggau tabi puji ngagai raban PDRM kelebih agi raban polis di Saratok enggau staf polis ke udah pinchin gawa.

“Besampika raban PDRM kitai ditu liat ati enggau seruran ransing gawa nyaga pengelikun menua enggau pengelantang rayat menua tu.

“Aku mega arapka bala rayat deka berasai likun belama enggau temegah meda pemanah pengawa dikereja raban Polis kitai ditu.

“Sekali agi aku meri selamat ngintu Hari Polis Ke-215 ngagai semua raban polis enggau pinchin polis.

“Jasa kita seruran dikenang. Terima kasih udah nyaga kami enggau menua,” ku Ali nyimpul jaku diri.

DIPEBASA… Ali meri basa ngagai Perbarisan PDRM ba Padang Kawad ba pengerami Ngintu Hari Polis Ke-215, pagi tadi.

Suara Sarawak