PAKAN: Rega komoditi kelebih agi sawit ke diatu niki ari taun ke dulu udah mai ubah enggau meri ngenyenangka ati bala pekebun mit sawit kelebih agi bala pekebun di menua pesisir.

Suara Sarawak bisi udah ngerandau sekeda pekebun sawit mit di menua pesisir ari Pelilih Menua Pakan ti mega tebilang enggau komoditi lada.


LIDI JANTENG

“Arapka rega sawit berega agi ari rega ke diatu taja rega maya tu pan umbas pemanah. Kebuah pia ambika lantang agi ati kami di rumah panjai begigaka belanja enggau pemakai.”


MARTIN MANGGIE

“Ransing mega ati nurun ke kebun lalu endang dianti belama buah sawit mansau ambika dijual ngenataika belanja ngagai kami pekebun mit.Taja sawit berega, tang rega baja enggau rachun agi balat mar.”


MICHEAL TANDANG

“Ba penemu aku, kelimpah ari kitai ke nanam utai bukai, sawit tu mih endang sebansa komoditi ti ulih amat nyungkak penatai pemisi ba ruang bilik kitai di menua pesisir baka ke diatu. Pia mega aku arapka ngagai kitai di menua pesisir enti agi bisi tanah puang tau tanam mayuh sawit.”


LAWRENCE VALENTINE KHAPAT

“Sawit diatu chukup berega lalu ulih nambahka penatai pemisi kami pekebun mit taja rega sawit bisi nurun niki.Arapka perintah beratika rega perengka dikena kami bekebun baka baja enggau rachun ti semampai niki rega kebendar bisi ngeruga penatai pemisi.”

Suara Sarawak