KELAI PENYIRU… Nelson nyuaka bantu ngagai sida ke tasah angus di Kampung Bahagia Jaya Teku, ensanus.

SIBU: Penusah ditapi raban ke tasah angus di Kampung Bahagia Jaya Teku, ditu udah bela nerima perati ari siku nembiak pemain TikTok.

Nelson Dieh Sing Kiat, 6, madahka diri keran deka mantu sida ke tasah ketegal sinu betatika nasip sida nyentuk penusah nya nabanka nyawa.

“Pengudah beratika nasip ti nuntung sida, dia aku ingin deka mantu ngelempung tating penusah sida.

“Nya kebuah, aku nanya indai pasal deka nyuaka bantu kelai sinu ngenang nasip sida ke tasah angus nya.

“Nasip endar indai ngemendarka aku sama nyuaka bantu ngagai sida ke tasah angus tu,” ku Nelson.

Nelson disempulang indai iya, Tiey Beredai Entulu, 30, mansutka jaku nya pengudah nyuaka bantu ngagai sida ti tasah angus, ensanus.

Ku Nelson, entara bantu ti dianjung iya nya bantu pemakai baka telu, mee, minyak sumai, sos chili, gula enggau kichap.

“Pia mega, kami duai indai bisi nyuaka bantu bukai baka penuche pinggai enggau gari, sabun, berus ngeli, kopi enggau teh,” ku iya seraya madah ngena RM400 asil ari bayar royalti Tiktok.

Nya kebuah, iya ngarapka bantu nya ulih ngelempung tating penusah sida sereta arapka sida ke tasah angus tu sabar nempuh penguji besai tu.

“Arapka bantu ke mimit ari aku nya ulih ngelempung tating penusah sida ke tasah tu sereta besampika sida sabar nempuh penguji,” terang iya.

Dulu ari nya, dua buah rumah di Kampung Bahagia Jaya Teku angus lengis ngujungka peranak dia semina tinggal gari ba punggung sereta nabanka tiga nyawa.

Suara Sarawak