KUCHING: Aktivis Nyaga Hak Mensia Sarawak, Peter John Jaban enggau Bill Jugah meri terima kasih ngagai Perintah Sarawak laban pemujur bulih kuasa ngaku sida ke nadai peranak diadaka ba Sarawak lebih agi raban anak mit.

Ku Peter, iya ngansak Perintah Sarawak bejalaika pengawa nya kenyau ari taun 2016 laban beribu peranak tulin ba menua ulu nadai dokumen sah dikelala nyadi rayat Malaysia ketegal pekara bukai.
“Ba penemu aku, tu nunjukka raban bekuasa Perintah Besai puntan meretika konteks khas nengeri sereta sejarah enggau budaya orang asal.

“Aku chukup gaga lebuh Menteri Pemansang Orang Indu, Anak Mit enggau Pengintu Pengelantang Komuniti, Datuk Seri Fatimah Abdullah ngansak Premier Sarawak Datuk Patinggi Tan Sri Abang Johari Tun Openg beratika isu nadai peranak enggau Menteri Besai Datuk Seri Ismail Sabri Yaakob ngambi sida nyadi peranak Malaysia,” terang iya, kemari.

Ku iya, Sarawak patut bisi kuasa ngaku peranak nya pengudah bulih baru status asal nyadi bakih kunsi ti sebaka enggau Semenanjung enggau Sabah dalam Perintah Besai Malaysia.

Peter enggau Jugah udah mantu mayuh orang nadai peranak di Sarawak lebuh minta setipikit nyadi peranak Malaysia madah, sida pechayaka isu nadai peranak nya ulih diputar enti Perintah Sarawak diberi kuasa.

“Kami nemu mayuh kebuah rayat Sarawak lebih agi anak menua nadai surat beranak enggau tinggi ngambi ngelala sida nya rayat Malaysia,” ku Peter seraya madahka apai indai puntan ngaga ripot pengada sida ngagai opis pelilih tauka opis pengerejister bansa laban diatu ba menua entigis.

Peter ke mega kaban komiti Persekutuan Hak Asasi Manusia Global madah, mayuh apai indai ba menua ulu mega buta urup enggau enda nemu pasal guna rejister pengada anak sida.

“Apai indai semina sedarka guna surat beranak lebuh sida deka rejister anak masuk belajar ba sekula perintah tauka lebuh anak sida minta kereja ba mengeri,” terang iya.

Terang iya, nembiak nya engka enda ulih diterima masuk sekula perintah sereta nerima servis pengerai pechuma ari klinik enggau sepital perintah enti nadai dokumen nya.

“Nembiak tu mesti diaku nyadi peranak nitihka penerang betulis tuai raban bansa sida, enda ulih ngena surat beranak enggau tingki laban sistem tu semak agi enggau undang-undang adat tauka adat sida mega undang-undang di Sarawak,” terang iya baru.

Peter John Jaban

 

Bill Jugah

Suara Sarawak