Bala orang tuai di rumah panjai benung belajar ABC sereta nulis.

KAPIT: Tebal agi orang ngerunding pengawa belajar semina patut dilempaika ba bau bala nembiak aja laban sida tu ti patut pandai enggau nemu macha.

Bekau ari nya, apai indai ti sigi enda kala sekula dikumbai kitai buta urup laban sida enda nemu nyepil, nulis tauka macha.

Penanggul tebantai maya pengerekai pandemik Covid-19 dia apai indai di rumah panjai ngelakka anak belajar ngati kediri laban sida nadai nemu chara ngajar tauka mantu anak belajar.

Nya ti balat meri empas ngagai anak di rumah panjai enda belajar, bepanggai penuh ngagai pengajar enggau enda ibuh deka neruska pelajar.

Pekara tu balat nerima perati bala pengajar Sekula Primari (SK) Nanga Oyan iya nya sebuah sekula primari di menua pesisir ba Pelilih Menua Kapit.

Kepala Pengajar SK Nanga Oyan Mohamad Mobun ngambi gambar rambau ngabas nembiak ti benung belajar ba rumah panjai.

Kepala Pengajar SK Nanga Oyan Mohamad Mobun madah, penanggul pelajar nembiak tu majak balat diasaika laban rumah panjai mar dilawa ketegal pejalai ngagai urung 10 buah rumah panjai di kandang menua nya agi tubah ngena perau.

“Ba baruh Program Ruai Based Learning (RBL) kami ngatur program rumah panjai iru ungkup bala pengajar di SK Nanga Oyan ke alai sebuah rumah panjai tu dijaga dua tauka tiga iku pengajar.

“Siti ari program ti diatur ba baruh program tu iya nya muka kelas khas ungkup orang tuai belajar, kelimpah ngayanka pemesai guna pelajar ngagai bala apai indai di rumah panjai program tu mega ulih ngerapitka kaul bala peranak rumah panjai enggau pengajar,” ku iya lebuh dirandau Suara Sarawak, kemari.

Ku iya, program ngajar orang tuai tu mega tau nyadi teladan ngagai bala nembiak besekula ngambika sida terus nanam semangat enda ngetu ngiri penemu baikka umur agi biak tauka udah lunggar umur.

“Genap rumah panjai patut diberi peluang ngemansangka pekara pelajar laban nya meh nyadi peransang bala nembiak di menua pesisir angkunka pengawa belajar.

Mohamad (tiga kanan) begambar enggau raban pengajar di SK Nanga Oyan, Kapit.

“Renggat kepenudi taun siti nyin kemari diatur bulan November ke alai renggat baru ngajar orang tuai tu deka diatur bulan April 2022 tu ila.

“Bala pengajar deka diberi tanggungpengawa nyaga sebuah rumah panjai awakka ulih nemu enggau meretika sukut pelajar orang tuai enggau nembiak di rumah panjai ba baruh Biro Pelajar.

“Pelajar ti diajar ngagai apai indai berengkah ari nyepil ABC enggau nulis urup sebedau sida diberi latih macha.

“Naka diatu timbal ngagai program tu chukup manah,” ku iya.

Mohamad madahka pekara belajar ti nadai adan tu meri pangka besai ngagai peranak di rumah panjai kelebih agi apai indai ti sebedau tu enda sedarka guna pekara pelajar anak sida.

“Penyedar pasal sukut pelajar nya ti beguna awakka apai indai meretika penanggul ti ditapi anak sida lebuh nulis enggau macha sereta sedarka semina pelajar aja ulih ngubah tikas pengidup ruang bilik.

“Ari program tu mega apai indai nembiak belubah-lubah nemu macha pesan dalam telefon enggau surat ari sekula sereta ngujungka sida nemu mimit chara begunaka perengka digital.

“Program tu deka diteruska kami, lalu aku meri terima kasih ke sukung bala pengajar SK Nanga Oyan laban udah bebendar ngemujurka program nya,” ku iya.

Entara 10 rumah panjai ke bekaul tu iya nya Rumah Weng (dijaga pengajar Dominic Hendry enggau Fadilla Layang), Rumah Bangkong (ti ngembuan 35 iku nembiak dijaga pengajar Kilat Stone, Zaeky enggau Ruddy), Rumah Nawin (Pengajar Nur Nadirah enggau Nor Amalina), Rumah Lumpun (Pengajar Richard Sabang enggau Johnny Limbei), Rumah Jimmy Jarau (Pengajar Corina, Kathrine enggau Saidiah), Rumah Darwin (Pengajar Marenny Radin, Rose Anding enggau Pamela), Rumah Nisson enggau Rumah Peter (Pengajar Mohammad Fadzia, Awang Saruji enggau Nur Hananni Puli), Rumah Sengiang (Pengajar Nur Connie Kartika enggau Syami) sereta Rumah Along (Pengajar Jaffery Belitang enggau Daniel Jalong).

Pengajar ari SK Nanga Oyan benung ngajar bala orang tuai di rumah panjai nyepil urup.

Suara Sarawak