INDUSTRI BARU… Dr Annuar mendingka taklimat pasal penumbuh SMITH di Tanjung Kidurong, Bintulu.

BINTULU: Pengawa numbuhka Hab Inovasyen enggau Teknologi Perubat Sarawak (SMITH) ba Tanjung Kidurong, Bintulu nyadi hari besejarah ungkup industri perubat enggau farmaseutikal Sarawak.

Sapit Menteri Pelajar enggau Inovasyen, Dr Annuar Rapaee madah, penumbuh SMITH deka nentuka menua mansutka mayuh agi produk pengerai enggau perubat sereta enda bepanggai ngagai kereban enggau ubat ti diimport.

“Aku kala madah ngagai Premier Sarawak (Datuk Patinggi Tan Sri Abang Johari Tun Openg) pasal kitai (Sarawak) nyengkaum Sabah enggau Kalimantan apin bisi industri farmaseutikal ti maju.
“Kami enda ulih ngasilka ubat enggau kereban ti diguna. Nya kebuah aku madah ngagai iya (Abang Johari) pasal pengelemi enggau empas kelalu bepanggai ba ubat import kelebih agi berubat,” terang iya.

Dr Annuar mansutka jaku nya ngarika Abang Johari bejadika Pengawa Nasih Tanah SMITH ba Tanjung Kidurong, Hari Dua tu tadi.

Iya mega madah, pengawa numbuhka SMITH tu engkeman laban deka nyadi pemekal ubat dudi hari lebih agi di Malaysia Timur.

Nangkan nya, Perintah Sarawak sedarka pemesai guna numbuhka hab tu ngambi SMITH nyadi palan pemansang industri perubat enggau farmaseutikal di menua tu enggau selampur Sarawak.

Kelimpah ari nya, SMITH deka ngerembaika latih indu misi ngambi nempa mayuh agi indu misi ke bisi latih ba menua tu seikas enggau penau menua maju.

Suara Sarawak