NGESAH PENUSAH RAYAT.. Ali disempulang bala bukai meda gaya jalai runtuh ketegal tanah tebing tusur ba Jalai Ulu Sungai Benang di Kabong ditu, tadi.

SARATOK: Kaban Parlimen Saratok, Datuk Ali Biju udah limpang ngabas penusah jalai runtuh ba Ulu Sungai Benang, Kabong ditu ketegal tanah tebing tusur.

Ba pejalai nya, iya udah nerima penerang ke alai selapat tebing tauka ‘Sheet Piled’ deka digaga sepemanjai arung jalai nya.

“Nitihka penerang ari Opis Parit enggau Entali Ai, projek ngaga selapat tebing jalai tu agi ba renggat tinda.

“Nambahka nya, tinda projek mega udah ditutup kena 23 March tu tadi,” ku iya lebuh dirandau Suara Sarawak lebuh ngabas endur penusah nyadi tadi.

Ali madah baru, penusah tanah runtuh nya majak ngirauka ati kelebih agi bala pekebun mit ti betengahka jalai nya.

“Pengawa bala pekebun mit nyau tejanggal labab enda ulih ngangkut enggau nyual asil kebun baka sawit, buah semangka, genuk enggau ke bukai.

“Nya kebuah aku ngarapka pengawa nyeleti jalai tu ulih dirumban ngambi peranak ditu ulih ngereja pengawa sida.

“Pia mega Projek Ngaga Selapat sepemanjai jalai enda tau enda dipejalai enggau jampat nentuka pengelikun penguna jalai ditu,” ku iya madah nyemetak.

Berebak enggau nya, Opis Parit Enggau Entali Ai udah nembuka langkar Koridor Tebing Sungai Benang.

Taja pia, perambu langkar nya agi ba renggat kepenudi, nganti dikemendar lalu nya pelin timpuh panjai mutarka penanggul tanah tebing tusur dia.

Suara Sarawak