KUCHING: Pemenggi gelar Dara Kenyalang deka nerima perais mata duit RM10,000 enggau perais berega bukai.

Produser Silver Halides Pictures, Harry Frederick Diglin madahka dara bajik ba penuduk lumur dua nerima RM7,000 seraya ketiga bulih RM5,000.

Ku iya, perais sagu ati mega bisi diberi ngagai bala pemekit ba penuduk keempat ngagai keenam enggau penyampau RM2,000 siku.

“Reti iya, enam iku pemekit ti mujur masuk renggat kepenudi Pekit Dara Kenyalang ila endang udah bisi ungkup, penyampau aja enda sebaka.

“Kelimpah ari perais mata duit, perais enggau tepa berega bukai mega nganti bala pemenang. Tang aku enda ulih mantaika pekara tu silik agi diatu,” ku iya lebuh dirandau Suara Sarawak, kemari.

Berindik ari nya, Harry ngansak bala indu ke agi rumpas ba menua tu anang lembau nganjung diri bepekit lalu ngerebut gelar Dara Kenyalang ti keterubah.

Iya madah, tu mih pelasar kitai anak Sarawak mantaika pemajik Orang Asal ti tulin kelimpah ngembuan ulah ti siru enggau landik sereta pintar runding.

“Aku sekali agi nesau enggau meransang bala indu dara selampung Sarawak rejister diri sebedau tauka kena 1 April tu, haribulan kepenudi ditetapka bala komiti.

“Kena manah peluang tu. Bantaika identiti indu Dayak enggau Orang Ulu ti berani enggau pintar, pandangka penau enggau pengelandik kita ngagai dunya,” ku Harry madah nyemetak.

Ke penerang, audisyen Program Realiti TV ba 12 bagi menua di Sarawak deka diatur ba Limbang, Miri, Bintulu, Mukah, Kapit, Sibu, Sarikei, Betong, Sri Aman, Serian, Semarahan enggau Kuching.

Indu dara peranak Malaysia beumur 18 ngagai 28 taun sekalika bansa Iban, Bidayuh tauka Orang Ulu tauka penakan bansa asal endang diperansang masuk pekit tu.

Nambahka nya, sida mega mesti ngembuan peninggi 155 cm enggau tinggi agi, berat tubuh ti engkeman, nadai kala beruang bilik sereta sedia ngaga rikoding pengelama dua bulan, ari pun bulan April nyentuk ujung Mei 2022.

Bala pemekit tau nganjung peminta datai audisyen nengah email Dara.Kenyalang.Pageant@gmail.com ke alai tiap peminta enda tau enda disempulang gambar penuh enggau jelan pemesai, video penau ba seni asal enggau resume tauka SV.

Sebarang tanya tau telefon ngagai lumur WhatsApp 011-5130 6649 (Dara Kenyalang) seraya berita pemadu baru pasal pekit bisi dikunsi ba laman Facebook Dara Kenyalang enggau Instagram dara_kenyalang sereta akaun TikTok dara_kenyalang.

Poster Pekit Dara Kenyalang

Suara Sarawak