Perau perang Iban beumur 110 taun pesaka tuai ari Gensurai, Betong
RENGKA PIRING… Numpang Liman nyendiaka perengka miring perau perang di Muzium Sarawak dalam taun 1980. – Gambar ari Datuk Patinggi Tan Sri (Dr.) Alfred Jabu Numpang

BANSA Iban kelia endang tebilang nama ketegal pengering beperang lebuh jeman kolonial Barat suba, pemerani etnik Iban tu dikumbai bisi strategi perang pemadu nyelai di Sarawak kelimpah tampak rita landik ngaga perau perang.

Entara utai dikemegah Sarawak, entara pesaka pemadu tuai di menua beumur 110 taun iya nya perau perang Iban dikumbai Pesaka Jeman Gensurai Buah Ati Anak Raja ke mega pesaka sejarah ti dipandang ba Muzium Budaya Borneo ditu.

Perau pemanjai 11.3 meter enggau pemesai 1.8 meter nya dibai Opis Muzium Sarawak dalam taun 1969.

Nitihka penerang, perau panjai nya ngundan 21 ngagai 25 iku bujang berani ba pejalai ari rumah panjai Gensurai di Layar, Betong lebuh beperang ngarika Rajah Charles Brooke di ulu Sungai Rajang dalam taun 1915.

Diatu, perau nya dibali chura chelum enggau garis mirah enggau kuning lalu ba tisi perau nya bisi ditulis nama iya, Pesaka Jeman Gensurai Buah Hati Anak Raja.

MINTA BEREKAT… Temengong Richard Mulok nyendiaka perengka kena miring perau perang. -Gambar Ari Datuk Patinggi Tan Sri ( Dr.) Alfred Jabu Numpang

Nitihka sejarah ditusi peranak rumah panjai, perau nya digaga siku lelaki Melayu benama Ate ke diau ba tebing Sungai Rimbas.

Udah nya, perau nya dibeli Tuai Rumah Anding Dundang enggau semilan anembiak iya berega 50 dollar pirak dalam taun 1912.

Nitihka pengarap kitai bansa Iban, perau digaga bansa Melayu nya manah laban manah dikena ba nanga sungai enggau tasik ari digaga diri empu.

Perau tu mega dikena ngenang pemanah kaul rat entara Iban Saribas enggau Melayu ba tebing tasik ke udah bebala nengah kawin champur.

SEJARAH PERAU PERANG IBAN

PESAKA TUAI… Perau perang Iban digelar Pesaka Jeman Gensurai Buah Hati Anak Raja ti dipandang di Muzium Budaya Borneo.

Nitihka Felo Pemansik Besai Institut Pansik Borneo Unimas, Dr Valerie Mashman dalam keretas pansik iya, sebedau tu bot nya digaga nyadi keresa lama ti dibasa.

“Orang lama Gensurai madahka maya perau nya dibai pulai ke rumah panjai, sida udah bejalaika pengawa miring enggau genselan dua iku manuk.

“Tembu pengawa miring tadi, sida nyimpan perau nya enggau manah.

“Taja pia ba taun 1915, Tuai Rumah Anding nerima gerah mesti nyereta ekspedisi soldadu dikena ngelaban penyelawai ba Bukit Salong, atas Mujong,” terang iya.

Dr Valerie mega madah, udah nya Tuai Rumah Anding nyendiaka perau nya dikena beperang sereta disaup menyadi iya Menggin, enggau anak Menggin benama Gaun ngena tajuk ti udah digaga dikena nyukung perabung ari daun kajang.

“Awak entara papan dalam perau nya mega ditutup ngena damar.

“Sebengkah pengawa mega diatur ba rumah panjai kelai basa ungkup perau perang enggau rumah panjai nya.

“Siku lemambang udah nyadaka renung kayau dikena ngangauka Petara Perang merekatka perau enggau bujang berani sida.

“Hari siti, sida nyayat anak jani lalu ati iya diperesa dikena nela nasip sekalika nya ngelaika hari manah tauka enda.

“Udah nya, raban indu betuaika Gulang Anchap enggau Chemerai Landoh ngendas perau nya ngena minyak enggau bungai.

“Lebuh nya sida besampi ngangauka semengat jagu, ular tedung enggau ular sawa tama dalam perau ngambi ulih laju merau ngagai endur bala munsuh.

“Leka sampi ke disada nya mega disempulang enggau bunyi tawak ngangau ke Petara Perang. Lebuh perau nya dibai ke ai, sida ke indu pen nikau leka asi enggau asi kuning nuju perau nya,” terang iya baru.

Nitihka sejarah pasal perau ditusika Bandang Numpang, menyadi Tan Sri Alfred Jabu Numpang, iya madahka sebedau beperang, jani indu disayat nyadika genselan enggau semilan piring diengkah ba atas perabung mua perau, lima ba dalam enggau tujuh di belakang.

Nya mih entara kebuah bujang berani mujur beperang pengelama beberapa bulan.

EKSPEDISI PERANG 1915

Dr Valerie madah, Rajah Charles Brooke udah nguji nagang Iban ke melunggang ngagai entigis di ulu Sungai Baleh, Kapit lebuh enda ngemendarka sida diau mendam dia.

Taja pia, Rajah Charles Brooke nyau nerima tuai Penghulu Merum ti ngetuaika pemindah Iban ngagai Gat enggau Sungai Mujong ba pun taun 1900-an.

“Taja pia, sekeda bala Merum ti nyerang raban bansa Kayan ba adan menua di Borneo Belanda udah diukum mati dalam taun 1913.

“Dikena malas pekara nya, Merum udah ngetuaika bala bukai bedengahka pala lalu pengawa nya ngujungka Rajah ngelancharka dua ekspedisi soldadu, siti ngagai Sungai Gat kena Februari 1915 enggau di Sungai Mujong kena Mei 1915.

“Pekara nya mega dirikodka dalam Sarawak Gazet lalu madahka nya ukum berat ngagai penyelawai di Sungai Gat.

“Pekara tu mega dikena nagang peranak di Mujong ke udah munuh enggau niat sereta tinggi jaku madahka nadai siku bala perintah ulih ngalahka sida.
“Ekspedisi nya ngelaika pemujur soldadu perintah laban kubu Bukit Salong ke dikumbai enda ulih dialah udah diambi soldadu perintah.

“Tang ari buah penemu Bandang, bala Rajah alah lalu penemu nya disukung analisis pengudah ekspedisi.

“Kebendar, pekara tu nyadi pengelama tiga taun lalu dua agi ekspedisi nya dikena mulu raban bansa Iban mindah ari ulu Baleh,” terang iya.

PEMULAI PERAU KE GENSURAI NYADI PESAKA

Mulaika kenang, orang tuai Gensurai madahka perau nya besai reti laban udah kala dikena dalam ekspedisi soldadu ngagai Bukit Salong (Chalung) iya nya ekspedisi besai kepenudi ke meruan dikeingat sida.

Udah nya mega, Rajah Brooke udah genselan siku jani kelai bebaik lalu tu Pengawa Bebaik Kapit 1924 ti dpenyadi Vyner Brooke.

“Pengudah perau nya dianjung pulai ke rumah panjai, sebengkah pengawa diatur kelai makai selamat laban perau nya udah dibai pulai begulai enggau bujang berani.

“Tembu pengawa nya tadi, perau nya udah diengkah ba bansal beperabung ba tebing sungai.

“Nyau ke lama, bansal perau ti majak repuk nya dipindah enggau disimpah baruh rumah panjai.

“Berapa taun udah nya, Sendi Maling bemimpika siku lelaki madahka iya enda tan ensium bau tai manuk, pengudah tembu bejaku, lelaki nya lalu bebali nyadi perau.

“Pagi siti, Sendi nusika mimpi nya ngagai sida serumah lalu sida ngaga pemutus bansal mesti digaga baru ari tiang tebelian lalu mengkang teguh lebih 20 taun,” terang iya baru.

PEMINDAH KE BETONG

Dr Valerie Mashman

Ba taun 1949, lebuh Sarawak lepas ari dipegai perintah Jipun, Perintah Kolonial British udah ngempu kuasa dalam taun 1946 naka ulih ngulihka sukung ari komuniti menua tu.

Ku Dr Valerie, lebuh nya Pegawai Opis Pelilih D.L. Bruen ke chukup tebilang sereta dibasa orang Iban merambu perau nya dipindah ngagai Betong ngambi dipandang ba luar opis pelilih nya.

“Orang Iban di Gensurai setuju lalu madahka aki ini sida enggau ati gaga ngemendarka perau nya dipandang ba endur ke tampak enggau dikelala.

“Tang bisi mega sempekat udah diletak entara rumah panjai enggau Perintah Kolonial British iya nya minta nirika sebuah sekula primary ba Nanga Ajau atas tanah pemeri peranak Gensurai.

“Lebuh perau nya dipindah, sebengkah pengawa udah dikereja lalu sida mega ngelar perau nya ‘Buah Ati Anak Raja’,” ku iya seraya madahka perau nya mandangka pesaka pemadu berega enggau nyelai ngagai Sarawak.

PESAKA TUAI

Dr Valarie madah baru, kena Disember 1969, siku bansa Iban enggau kurator Iban keterubah Muzium Sarawak, Benedict Sandin nemuai ke Betong enggau merambu sebengkah eksibisyen mandangka pemesai guna bot nya patut dipandang ba Muzium Sarawak.

Udah nya, perau perang nya dibai ari Saribas ngagai Kuching lalu datai kena 26 Disember 1969.

“Taja pia, orang tuai Gensurai madahka sida kala diasuh mindah lalu madahka nya pengawa ke enda bebasaka komuniti ti ngumbai perau perang nya nyadi pesaka,” terang iya.

Ba Muzium Sarawak, terubah iya perau nya dipandang ba muzik adap timur begunan besai sereta nyadi pematak bala pengusung.

“Perau nya udah dipindah ngagai bansal Balai Tun Razak enggau udah nya dipindah ba luar Muzium Islam,” terang iya.

Nambahka nya ku iya, peranak Gensurai terus miring ba atas perau nya tiap Pengerami Gawai Dayak sereta meri basa ngagai perau perang nya taja perau nya udah dipindah ngagai muzium.

“Sida miring ba endur ke puang kala endur perau nya dipindah ngambi bulih berekat, penyuman enggau dilindung sereta ditulung semengat,” terang iya.

Sehari tu, perau perang nya dipandang ba Muzium Budaya Broneo.

Sebedau dipindah ngagai muzium baru nya, pengawa miring bebasaka Petara enggau aki ini udah diatur dalam taun 2020 betuaika Igai Melina ke mega Pemantu Pemansik Unit Iban Kaunsil Adat Istiadat Sarawak (MAIS), disaup Uking Naong enggau Thomas Sujang ari Kampung Batu Lintang, Layar, Betong.

Pengawa baka tu mandangka bansa kitai Iban endang raban bansa pemadu besai di Sarawak ke kaya enggau adat asal, budaya enggau pesaka.

Bansa kitai Iban chukup tebilang enggau pemerani beperang, bedengahka pala munsuh dikena ngetanka pengentap diri empu.

Penerang ti digumpul Dr Valerie ba pansik iya pasal perau perang Iban nya ari akaun rasmi Sarawak Gazete, 1915, randau enggau Bandang Numpang, orang tuai enggau peranak Gensurai, penerang ari Benedict Sandin dalam bup Robert Pringle Rajah and Rebels: The Ibans of Sarawak under Brooke Rule enggau Hamba Rajah ari A.B. wad.

Suara Sarawak