BEJADI… Harden begambar ungkup kenang enggau pengari ejensi sereta kunteriktor pengudah Pengawa Nasih Tanah Projek Nyeleti Jalai Ulu Paku, Undop, ensanus.

SIMANGGANG: Projek nyeleti Jalai Ulu Paku, Undop sepemanjai lapan kilometer (km) deka meri meri pemaik ngagai lebih 1,000 rayat kelai perintah keran nyendiaka perengkaguna ke meruan agi ngagai rayat.

Sapit Menteri Pemansang Penau, Datuk Francis Harden Hollis madah, pekara tu mega nyereminka penuduk Gempung Parti Sarawak (GPS) dalam Perintah Besai diatu.

Ku iya, sebedau tu projek beungkus RM30 juta ti udah dikemendar Opis Menteri Pemansang Menua Pesisir (KPLB) tang ditangguh ketegal penyarut politik ngujungka perintah betukar ba taun 2018.

“Projek tu ditampung baru dipejalai Opis Kereja Raya (JKR) Wilayah Selatan lebuh Perintah Perikatan Nasional (PN) megai perintah enggau disukung GPS.

“Nya kebuah, sehari tu (ensanus) kami udah beratika pengawa KPLB, JKR enggau raban kunteriktor ngambi ngemujurka projek ke deka meri pengelantang ngagai rayat.

“Endang amat nya perintah ngembuan tanggungpengawa nyendiaka perengkaguna tang pemansang nya mesti disukung rayat,” terang Harden.

Harden mansutka ba Pengawa Nasih Tanah Projek Nyeleti Jalai Ulu Paku, Undop, ensanus.

Pengawa nya mega ngambi nyerahka taba ngagai kunteriktor iya nya serikat Welfield Services Sdn Bhd ti diarika menijar iya, Pui Jin Leong.

Sama datai Residen Bagi Menua Sri Aman Datuk Indit Bangai, Tuai Penulung Sekretari KPLB Sarawak, Ahmad Faris Mohd Ghazali, pengari Menijar JKR Wilayah Selatan ke mega Menijar Projek, Angelia Billy enggau Pegawai Opis Pelilih Sri Aman, Mohd Ashree Wee.

Lebuh ngelansa pasal projek nya, Angelia madah pengawa nyeleti jalai tama bepun ari simpang besai nuju rumah panjai ba sitak Ulu Undop, Batu Lintang diatu benung dipejalai.

“Projek tu dipejalai ngena ungkus (tinda) RM19,197,131.90 lalu disadang tembu pengelama 18 bulan iya nya kena 12 Julai 2023.
“Pengawa pasal taba tanah udah diserah ngagai Welfield Service enggau UMRS Consult ti nyadi kunteriktor enggau jurutera perunding ungkup pengawa nyeleti jalai nya kena 13 Januari tu tadi.

“Entara atur pengawa nyeleti jalai sepemanjai 4.018km ke diatu (jalai batu enggau tanah) ngagai R1 enggau pemesai jalai 5.5 meter sereta jalur marginal 0.25 meter.

“Tu nyengkaum nyeleti jalai sepemanjai 4.241km dikena nangkir melakin jalai, tisi jalai enggau parit tisi jalai ngagai R1,” terang iya silik.

Angelia madah baru, pengawa bukai nyengkaum mindahka tiang karan enggau paip sereta masang pal jalai.

Ku iya, naka Februari tu tadi, projek nya udah tembu 0.28 peratus iya nya nyungkur enggau nyukat taba tanah.

Angelia andalka projek nyeleti jalai nya deka pulaika pemanah ngagai pengajar enggau raban Sekula Primari (SK) Paku.

Ba lansa bukai, ba sitak Ulu Undop bepun ari dari Kampung Guntong benung bejalaika pengawa masang paip enggau bisi sekeda rumah nya udah dilekat meter.

Kelimpah ari nya, penyawa nyendiaka bekal kuasa karan ngagai Rumah Guntong, Kampung Samak diatu ba renggat kepenudi ditembu.

Suara Sarawak