Syed Hamzah (tiga kanan) nyuaka perais ngagai bala champion pekit betanda Pesta Telaga Ai-MPP 2022 di Waterfront Telaga Ai ditu, kemari.

KUCHING: Nembiak rebak baru dikearap ulih ngaga pemutus ti betul ungkup pemaik enggau pengelantang dalam Pengawa Bepilih Besai (PRU) ti deka datai.

Sekretari Politik Menteri ba Opis Menteri Besai (Parlimen enggau Undang-Undang) Datuk Seri Syed Hamzah Syed Paie madahka nembiak baru enda tau pambar tang patut seati dalam milih tuai ti manah megai sida.

“Lebuh kitai nemu parlimen padam ila, anang belampung ati tang pilih meh tuai ti dikeandalka kita ulih nyaga, ngintu sereta meri pengelantang ngagai rayat.

“Ba parlimen tu, suba bisi 46,000 pengundi lalu nyema sistem ngundi otomatik dipejalaika ila, nyengkaum nembiak beumur 18 nyentuk 21 taun parlimen tu deka ngembuan 86,000 pengundi,” ku iya.

Iya bejaku munyi nya rambau Program Nutup Pesta Telaga Ai-MPP 2022 di Waterfront Telaga Ai ditu, kemari.

Iya nangkan nya andalka pengundi biak patut diseridi nentuka pemutus ti engkeman maya PRU dipejalaika enda lama agi.

“Lebuh ba taun 2018 suba maya perintah bekalih semua projek masegit di parlimen kitai dikinsilka magang nyengkaum tujuh buah projek jematan di Sarawak.

“Ngarapka sekali tu, rayat nemu nentuka pemutus ti manah laban pekara nya beguna ungkup anak, uchu enggau raban nembiak baru ti deka datai,” ku iya.

Ngelansa program kemari, Syed Hamzah madahka, program tu chukup manah laban ngaul semua renggat umur nyereta aktiviti ti disediaka.

“Aku bisi berandau enggau Datuk Seri Wan Junaidi pagi tadi, lalu iya meri jamin nyema iya agi terus nyadi kaban parlimen di sitak tu, iya besetuju meri agih belanja ninting taun penyampau RM25,000 ngagai Komiti Pemansang enggau Pengelikun Genturung Pendiau (JKKK) Kampung Telaga Ai dikena ngatur aktiviti,” ku iya.

Sama bisi datai Chairman Kaunsil Kandang Mengeri Padawan (MPP) Lo Khere Chiang, Sapit Chairman MPP Datuk Ahmad Ibrahim, Adun Kota Sentosa Wilfred Yap Yau Sin enggau ke bukai.

Suara Sarawak