KUCHING: Parti Sarawak Bersatu (PSB) nyiri Baru Bian nyadi Direktor Pengawa Bepilih Besai, seraya ngiring parti napi Pengawa Bepilih Besai Ke-15 (PRU-15).

Pekara nya dibantaika Presiden PSB Datuk Seri Wong Soon Koh, lalu madah semua kaban Kaunsil Presiden deka duduk begulai nyadi kaban Komiti Pengawa Bepilih Besai PSB.

“Ba aum keterubah kami sehari tu (kemari), komiti ngaga penetap atur nyengkaum ngelala penuduk ke deka endur bediri, nyendiaka chalun bepenau, netapka kriteria milih chalun, ngelanggur manifesto enggau pekara bukai bekaul,” ku iya madah ba sebengkah penerang, kemari.

Kenu ku Soon Koh, beratika penyadi ba Putrajaya diatu, PRU-15 disadang diatur tumu.

Nya alai, ku iya ngambika nyawa nyarih agi didinga, parti penyakal di Sarawak enggau Sabah deka bekerejasama nyadi siti tim ke begempung.

Ungkup tuju nya, raban sida benung berandau enggau parti penyakal ke ngembuan runding ke sama di Sarawak enggau Sabah nempa Perikatan Borneo, ngambika nyadi kuasa ketiga ke ulih dikeandal dalam politik perintah besai.

“Aku andal Perikatan Borneo deka disukung semua rayat Sarawak enggau Sabah laban tu keterubah iya strategi begempung enggau tuju ke sebaka dalam perintah besai.

“Pengawa bekunsi sinergistik tu deka ngangkatka nengeri-nengeri ba Borneo,” ku iya.

Suara Sarawak