Rebak baru patut ngemeranka dagang digital
Entara produk ti tau dipandangka nengah chara dagang digital iya nya berau.

KUCHING: Raban komuniti B40 diperansang terus ngena chara dagang digital ungkup ngelakuka produk ti dikeluarka sida kelebih agi produk asil ari raban B40 empu.

Pemungkal Berau by Benak Raya, Imelda Bragie Jamie madahka chara digital nyadi pelasar ngelakuka barang dagang pemadu engkeman maya diatu.

“Sebedau tu enggau kerejasama Hong Leong Bank Malaysia aku dipinta ngaga sebuah dokumentari ngaul raban komuniti B40 ngelakuka produk sida nengah dagang digital.

“Pengawa nya diatur ba rumah panjai Tuai Rumah Jack Genting San Undop Simanggang kena 26 enggau 27 Februari tu tadi,” ku iya lebuh dirandau Suara Sarawak, kemari.

Ku iya, dokumentari nya digaga endang khas ungkup meransang peranak rumah panjai ngemeranka dagang nitihka chara digital baka mandangka enggau ngelakuka produk sida.

“Raban ti diselinting kami sigi endang komuniti rumah panjai enggau raban B40 laban sida tu kebendar ngembuan mayuh produk semina sida bedau tentu landik ngelakuka produk tu nengah digital.

“Aku andalka mayuh agi program baka tu diatur awakka ulih nyaup raban B40 di rumah panjai ngiga penatai pemisi kelimpah nambahka penemu sida dalam dunya dagang,” ku iya.

Imelda ti kala nempa nama lebuh diplilih nyadi ikon orang dagang ba pekit ‘Shell Live Wire Top Ten Innovator 2020’ madahka raban bansa Iban kelebih agi ti diau ba rumah panjai anang enggai beserakup awakka ulih mansang ba pengidup.

“Aram kitai sama belajar bedagang ngena digital awakka produk kitai ulih dibai jauh agi ngerembai baka produk orang bukai.

“Aku mega meransang sida anang malu meda pendiau diri ti diau ba rumah panjai, kitai pan ulih mamsang maju baka orang.

“Produk kitai mesti dipebasa laban kitai di rumah panjai ngembuan produk ti nyelai kelebih agi produk asil pengelandik jari,” ku iya.

Kelimpah ari nya, iya mega madahka nengah dagang digital rumah panjai ngembuan peluang ti besai endur ngerembaika dagang temuai.

“Nya deka ngujungka dagang kitai majak laku laban mayuh temuai deka ngusung rumah panjai.

“Ari nya ekonomi peranak rumah panjai deka niki lalu tikas pengidup kitai deka majak manah,” ku iya.

Imelda Bragie Jamie.

 

KELAI PENYIRU… Nelson nyuaka bantu ngagai sida ke tasah angus di Kampung Bahagia Jaya Teku, ensanus.

Suara Sarawak