ASAL tambai bai ari Batang Panggau Libau, diberi orang din ngagai niang Temenggong Simpi Pala.

Kaban ruai Adat Asal Enggau Penti Pemali (AIEPP), Linggir anak Dang madah, niang Temenggong Simpi ngemedung datai din, baka niang Balang, seduai bela ulih ngemedung kin.

“Nya mih simpul penemu aku ba Replika Tambai Orang Pangau Libau tu.

“Terubah aku nemu, bepun ari randau aku enggau niang Panglima Jimbau ari menua Sadap dalam taun 2001 suba.

“Lalu udah ditemu (viral) ba dunya digital ari taun 2017, aku belabuh nyait lalu bekunsi enggau bala mayuh ke alai tambai nya sigi disabang.

“Bisi sekeda orang madah, salah endar pengawa aku ti bejualka tambai. Bah, kati enda minta sabang deh, ukai nya enda beupahka tulang ke gawa.

“Pia mega bebelika kereban dikena baka kaun, ubung, injin jait sereta ngaji orang nyait,” ku iya mantaika kenang diri begulai enggau Ruai, Suara Sarawak.

PENGINGAT… Tambai ditinggalka Linggir ba Batu Menalan Bedil, Bukit Sadok kena lemai 6 November 2021 suba.

CHURA ASAL

Ku penemu Linggir empu, orang ti deka nyabang, sigi nyabang lalu sida ke nemu pengingat tuai pan sigi deka ngembuan tambai asal kitai nya.

Ngenang pasal chura tambai dipelaba manggai beratus taun nya, ba simpul penemu iya, chura, langkar enggau ripih tauka tusun chura nya bisi reti kediri empu.

Kebuah pia ku iya, tambai nya endang ukai ditempa tauka digaga anak mensia di baruh hari tu, nya ti ngasuh gaya langkar baka nya, endang asal baka nya.

“Bisi siku orang diatu nyau nambahka teresang dia, laban kenu ku iya bisi kenyap tauka mimpi, engka amat kini.

“Tang aku enggai nambah. Empat taun udah nyait lebih 100 lambar tambai berengkah ari taun 2017.

“Bisi siku indu nyengala bemimpika tambai tu, pan nadai mih mantah chura, ripih tusun chura enggau langkar ditunda aku ngelama tu.

“Ba bulan March 2019, aku empu pan bisi mimpi bekaul enggau tambai tu pemulai aku ari Bukit Lingga.

“Nya mih simpul aku, sigi baka tu mih chura, ripih tusun enggau langkar asal ke dibai niang Temenggong Simpi Pala suba,” ku peranak asal Passai Bun, Sibu madah nyemetak.

PIRING BASA… Chunto piring ti dikena nyambut tauka ngelaluka penatai Tambai Panggau ba bilik penaik diri.

RETI LIMA CHURA

Nampung randau ke ujung agi, Linggir madahka nya mih Setunggol tauka Tambai ti patut dikembuan genap iku kitai ngambi maya bisi pengawa enda rigau-rigau ngitang sengapa tambai.

“Aku betemu enggau siku bakih ari Ulu Krian, Saratok lalu iya bisi ngambi tambai selambar ba aku.

“Pemuas nyaraka reti chura tambai nya, dia kami duai datai ba teori tauka penemu tu lalu kami duai setuju, ngasuh ngerembaika reti chura tu.

“Nyangka nya kebuah orang Panggau Libau meri niang Temenggong Simpi Pala, lima chura ba tambai nyadika malin, ke tenggau lalau bansa kitai idup,” terang iya.

Reti chura chelum ngulit, tuntung penusah, mayuh penguji ke datai ngasuh ati kitai rawan baka diatu kitai tusah ketegal ngetanka hak ba Tanah Adat Bansa Asal.

Chura kuning ti ngasuh kitai ngadang, seruran sedia enggau emampai nyikap diri napi penusah ba pengidup ti tau nuntung sebarang maya.

Seraya chura gadung meransang kitai ngembuan ati ke ransing enggau berani betempuh, belaban tauka besemekih enggau bansa bukai ba pengawa ngemansangka diri.

Chura burak kelai ati ti tuchi beresi enggau pengidup ti likun lalu ngajar kitai idup bebaik begulai enggau pangan diri, ngampunka pengilap lalu badu bedendam.

Kepenudi, chura mansau tu mandangka semangat berani enggau pengering bansa Iban, nadai utai enda alah dikereja, kering nunda pendiau Orang Panggau.

“Nyangka nya mih entelah reti chura ari sukut sejarah raban bansa Dayak Iban,” ku iya.

UNGKUP PETARA… Dua lambar tambai ti dituatka Linggir ba Balai Nyabung, Bukit Lingga.

SAMBUT BASA

Linggir sigi mekat barang sapa ti nyabang tambai ba iya, ngasuh sida nyambut tambai nya ngena siti Piring Turun Lima tauka Turun Lapan.

“Nyadi piring tu kena kitai nanggam iya, dikena kitai ngelaluka penatai iya ba pengidup enggau ruang bilik kitai empu.

“Nya mih pemesai sambut basa nyadika kelai ngambi iya tau “idup”. Ngambi iya tau nulung mandung, mai tuah mai limpah ke bilik penaik kitai.

“Ngambi pulai ke penyelap embap penyenang pengelantang ba kitai ke ngempu iya.

“Lalu sapa ke bidik lansik endang bisi diundang Petara nengah mimpi, igau tauka kenyap.

“Anang irauka chura enggau langkar Setunggol tu. Nadai kurang nadai penimpang baka ke asal laban “bisi orang madah” nya ngena sereta betul,” terang iya nyemetak.

PENEMU TUAI

Linggir mega bekunsika penerang ari aya kitai Thomas Tegong Laka pasal reti lima chura Tambai Panggau ba siti raban Whatsapps lebuh tudah tuai nyaut tanya bala mayuh ti nampung ruai nya.

Reti lima chura tambai Panggau baka tu, mansau nya chura diberi Kumang ti mai reti Berani seraya chura Burak ari Ini Andan ke tanda ati kitai Iban enda jai sereta nelap.

Gadung nya chura diberi bini Sempulang Gana ti nunjukka menua manah alai ngiga pengidup baka bumai lalu Kuning mandangka bansa Iban kering ati, enda mudah alah ayu, tinggi bulu sereta kering tulang makai asi ke diulih maya kitai bumai betaun.

Nambahka nya, chura Chelum mai reti pengerai enggau engkerabun diberi Ini Manang kena ngelaban semengat utai ke jai sebelah tanah ti udu ngayahka anak mensia anak uda.

“Nya reti tambai tu bala menyadi. Aku gaga endar ati meda sekeda kita udah bisi ngembuan iya tang munyi ku menyadi kitai, Linggir anak Dang tadi anang enda ngintu emparu iya enggau manah.

“Anang empelita enggau nempayaka iya (tambai) enggaika kitai dianu orang di atas langit din.

“Mesti ingat mega, chura kesumba mansau ari atas, chelum ari baruh maya kita nuatka iya.

“Kesumba mansau nya tanda berani lalu chelum nya pagar, kuta enggau engkerabun,” ku lalau ari aya kitai Thomas Tegong Laka ngambi nyamai kitai ngambat dalam ati diri.

Nambahka nya ku Linggir nampung kenang iya baru, genap kali nuat, ngitang tauka ka ngena Tambai maya bisi pengawa, agih ke siti piring Turun Lima tauka Turun Lapan.

“Ingatka mega ripih chura enda tau enda kesumba tauka mansau ari atas, lalu chelum ari baruh.

“Kebuah pia laban bisi orang saru lalu nuatka tambai nya tunsang, chura chelum ari atas, ni ka nyadi baka nya.

“Nya alai aku endang semampai mekat sida ti udah nyabang tambai ngambi nuat, ngitang tauka ngena tambai nya enggau chara ti betul,” tandu iya.

NGELALU PETARA… Tambai Panggau diimbai ba Pandung Gawai.

BALAI NYABUNG

Nampung baru kenang, Linggir madahka tambai ke dituat dua lambar ba palan Balai Nyabung apin bala sida nurun pulai tengahari kena 21 November 2020, ditinggal ungkup ‘orang’ ke nguan menua nya.

Sida sebuat betubuh sepuluh rambau pejalai tiga hari apus berengkah ari 20 nyentuk 22 November 2020, napatka menua Balai Nyabung.

Bala sida nya, Lemambang Bungan ari Menyalin Asal, Anderson Cendai ari Nanga Gayau, Terabai Apai Juntan ari Baloi, Skrang enggau Uchumanang Unan, Tulai, Meradong.

Disempulangka Jefferson Neo Nuing Jemie ari Sengan, Sibu, Sumok Tangkun ari Nanga Gayau, John Ekau ari Traie, Debak, Laja Ujom ari Mapai, Kanowit, Muhd Hafiz ari Menyalin Asal sereta Linggir empu.

“Enti sema barang sapa ke mansa menua Balai Nyabung, minta kasih anang kita ngambi tauka mai tambai nya pulai.

“Nya ungkup Petara nguan menua nya. Sigi diungkupka aku ngagai Petara nguan Bukit Lingga dia.

“Sapa ngachau ngeregau Tambai nya, ti kita pedera renga aku enggai disalahka kita laban aku ninggalka nya enggau Leka Sampi sereta Leka Sumpah aku enggau Petara ke nguan Balai Nyabung, Bukit Lingga.

“Laban nya peminta sida rambau pejalai aku enggau bala kin kena 23 ngagai 25 March 2019 suba.

MENUA LAMA… Tambai Panggau dituatka kami ba Tembawai Tampun Juah, Desa Segumon, Balai Karangan, Kalimantan Barat rambau penemuai kena 3 September 2019.

“Enti kita ka ngembuan tambai tu, tau nyait kediri empu nitihka tusun tauka ripih chura ti udah dipadah dulu tadi.

“Ti enggai kiruh nyait, tau nyabang ari aku nengah lumur WhatsApps 010-8015431,” ku iya nyimpul randau.

RABAN KETAPU

Ke penerang, sida Linggir sebakih betubuh 17 iku udah numbuhka siti Gerempung Ukai Dikuasa Perintah (NGO) baru diberi nama Persatuan Peminat Kesenian dan Kebudayaan Ketapu Lanjang Dayak Sarawak tauka Ketapu.

Kenang manis agi, Ketapu udah dikemendarka Opis Pengerejister Gerempung (ROS) kena 5 November 2021 berebak enggau hari sida niki ke Bukit Sadok.

Aktiviti udah diatur bala sida Linggir baka Kelas Ajat Lelaki enggau Indu sereta mujur ngatur Pengerami Makai Lemai Bejadika Ketapu kena 29 Januari 2022 tu tadi.

Ambika semua nemu, raban Ketapu diatu mega benung muka kelas belajar Kuntau ungkup sida ke bisi ati belajarka seni ngetanka diri nya.

Sebarang penerang enggau tanya silik pasal kelas enggau pekara bekaul bukai tau telefon tauka WhatsApp ngagai Linggir empu ba lumur ti udah dipadah tadi.

Suara Sarawak