KUCHING: Perintah Besai enggau Perintah Sarawak udah ngemendarka agih belanja RM510 juta ungkup pemansang projek bekal ai di Bagi Menua Betong, ku Menteri Utiliti enggau Komunikasyen Datuk Julaihi Narawi.

Ku iya, tu nyengkaum bejalaika 25 Projek Rayat, lima projek sambung di baruh Langgur Pemansang Malaysia Lumpar Ke-11 (RMK-11), lima projek di baruh Opis Menteri Pemansang Menua Pesisir (KPLB) enggau dua projek Opis Pemansang Perintah Besai.

“Naka diatu, urung 93.8 peratus ari semua sitak di Bagi Menua Betong udah disikap ai beresi.

“Juluk perintah ngemanah sistem bekal ai deka nyadi nyata pengudah projek ba renggat perambu enggau dipejalai penuh.

Pengawa tu mega deka mutarka isu bekal ai beresi ba sekeda endur di Bagi Menua Betong,” terang iya.

Adun Sebuyau mansutka jaku nya pengudah bejadika opis baru Opis Bekal Ai Menua Pesisir (JBALB) Bagi Menua Betong, Hari Dua tu tadi.

Ku Julaihi, semua projek nya sebagi ari Sistem Grid Bekal Ai Sarawak ari buah penemu Premier Sarawak Datuk Patinggi Tan Sri Abang Johari Tun Openg dikena mutarka isu bekal ai.

Bekaul pengawa bejadika opis baru nya, Julaihi madahka perintah menua seruran betatika pengelantang endur pegawai enggau staf gawa.

“Tu mega nentuka staf ti bejalaika tanggung pengawa nyendiaka bekal ai beresi ba Bagi Menua Betong enggau selampur Sarawak enggau manah agi, sama mega di opis enggau ejensi perintah ke bukai,” terang iya.

Ungkup penerang semua, ringkat baruh opis mega bisi nyendiaka kiosk ungkup bebayarka bil baka chukai pintu, bil karan, bil gis, mayar jali rumah enggau ke bukai.

OPIS BARU… Julaihi bejadika opis baru JBALB Betong, Hari Dua tu tadi.

Suara Sarawak