Sekeda tuai rumah di Engkilili ke udah nyain petisyen nyukung Jugah masuk PRS.

ENGKILILI: Tiga taun udah pemangku chairman PRS Engkilili, Roy Gongkoi nadai kala mai baum, ku sapit ketuai PRS Engkilili, Tr Bangkong anak Mawing.

Ku Tr Bangkong, ngintu pengelantang pendiau bala kaban dalam parti siti ari tanggungpengawa nyadi pemangku chairman pan nadai dikeibuhka iya.

Nya alai, Sapit Ketuai PRS Engkilili Tr Bangkong ningkah penemu ti dipansutka pemangku chairman sebedau tu ti madahka PRS Engkilili enggau Batang Ai enda setuju Jugah masuk PRS.

Tr Bangkong mega madahka Roy udah ngelaungka bala komiti besai PRS lebuh mansutka penemu ngagai media.

Kenu ku Tr. Bangkong peminta Jugah deka masuk PRS kebendar udah disukung 31 iku tuai raban bansa ke mega kaban PRS Engkilili.

“Penatai Jugah kitu (PRS) dikeandal ulih narit mayuh agi bala ketuai raban bansa sama begulai ba perabung parti PRS, lalu nya ulih ngasuh parti tu tegap,” ku Tr Bangkong.

Sebedau tu, Sekretari Besai PRS, Datuk Ir. Janang Bungsu udah mansutka penemu madahka Jugah mesti dulu minta masuk PRS nengah opis pampang Lubok Antu empu nganjung pom minta nyadi kaban parti.

Pom Jugah minta masuk PRS udah diterima kena 26 Februari tu tadi lalu disetuju Sekretari PRS Engkilili, Penghulu Nelson Bangga enggau bala bukai.

TR BANGKONG MAWING

Suara Sarawak