NGERANDANG DAGANG DIGITAL… Bala nembiak Rumah Emak mantaika Facebook Pages ke udah ditumbuhka sida. Ari kiba Lela Kabila, Jessnita Wati, Elizabeth Jugah, Slyvester Kenawang enggau Levis Emak.

RUMAH EMAK di Sungai Sut, Kapit tu entara rumah ke udah dipilih bejalaika program begulai enggau Sarawak Biodiversity Centre (SBC) enggau United Nations Development Program (UNDP).

Nya kebuah, pemberita Suara Sarawak udah berandau enggau siku pengari ari Rumah Emak benama Levis Emak.

“Munyi ke dipadah Tuai Rumah Emak, rumah panjai kami tu ditumbuh dalam taun 1996 laban rumah panjai lama angus ba taun 1994.

“Serayaka nganti ngentak rumah panjai baru, kami serumah diau ba dampa dulu.

“Sebedau tu, rumah panjai kami dikumbai Rumah Sipang laban lebuh nya kami betuaika Sipang Anak Sawing.

“Kena Ogos 2005, Tuai Rumah lama udah disilih orang baru iya nya Tuai Rumah Emak Anak Libau nyentuk diatu.

“Rumah Emak tu bisi 47 pintu bilik nyengkaum rumah nyembuah,” ku Levis ngepunka randau enggau Suara Sarawak.

KEREJASAMA SBC UNDP

TUAI KAMI… Tuai Rumah Emak begambar enggau bini iya, Sereni anak Mutek.

Nampung baru randau, Levis madahka sida serumah teulihka runding ngaga Facebook Pages Rumah Emak, Sungai Sut, Kapit tu endang ari buah penemu Tuai Rumah Emak empu.

Ku iya, sebedau numbuhka Facebook Pages tu, Tuai Rumah empu kala minta bantu ari Sarawak Biodiversity Center (SBC) & United Nations Development Program (UNDP) ngambi ngembing kami ngerandang dagang digital.

“Tuai rumah kami empu ke minta saup SBC enggau UNDP ngajar kami sentang chara bekenaka media rama ke ditemu chukup beguna ba jeman moden tu dikena ngelakuka produk dijual kami serumah.

“Munyi ku utai ke suah dipadah Tuai Rumah Emak, sayau endar nyema pengelebih dikembuan ba menua tu enda dikena baka media rama ke chukup besa reti mantu komuniti lebih agi kitai di rumah panjai.

“Nya kebuah, Tuai Rumah Emak suah meransang kami bela ngambi bagi ngemujurka program tu laban SBC enggau UNDP tu nyaup ngerandang jalai.

“Tambah mega, kami serumah ditu endang landik ba tunjuk jari lebih agi pengelandik asal, nya kebuah pengawa ngaga Facebook Pages tu nipakka juluk kami deka ngangkatka tikas idup diri.

“Kebendar, udah lama sida SBC enggau UNDP deka datai ke rumah panjai kami bejalaika projek tu.

“Tang mih pengawa nya nyau suah endar tejanggal ketegal mayuh penanggul lebih agi pengerekai Covid-19.

“Nya kebuah, program tu kira agi baru laban kami bejalaika program nya kena Disember 2021.

PEMATAK RUMAH PANJAI

NGERANDANG JALAI… Pengari ari SBC, Juvita benung meri penerang sereta ngajar peranak Rumah Emak sentang pengelebih teknologi digital dalam dagang digital.

Pia mega ku Levis, batang tuju ngaga Facebook Pages tu endang dikena ngelakuka produk sida serumah kelimpah mantaika pemanah rumah panjai sida ngambi ditemu orang di menua luar.

Ku Levis, ari nya tadi orang deka nemu pasal pemanah rumah panjai sida lalu ngelala projek ke bisi dijual sida.

“Tambah mega, orang luar tauka munyi ke suah disebut kitai nya menua ribai mayuh enda nemu kami ditu bisi bejualka bemacham produk baka pua kumbu, selampai, sirat, kain burie, tikai bebuah, bakul, uyut enggau ke bukai.

“Kami mega bisi nyual bemacham bansa sayur laban tebal agi kami serumah bisi betanamka sayur.

“Nya kebuah, kami serumah endang lantang ati pengudah bisi Facebook Pages dikena ngelakuka produk ngagai orang luar,” terang iya.

Levis madahka rumah panjai sida ngembuan mayuh pematak ke tau narit ati bala temuai enggau pengusung baka mayuh suah endur mandi tauka memarin.

Ku iya, Sungai Ngau Besai enggau Sungai Sut tu entara sungai ke chukup manah endur memarin.

“Pengusung ari luar mega tau datai ngagai rumah panjai enti deka ngasaika peneleba mandi ba Sungai Ngau Besai enggau Sungai Sut tu.

“Udah nya, sida tau niki ke rumah panjai enti sema deka meda pemanah enggau pengalus produk digaga kami serumah.

“Sida mega tau beratika kami serumah begagaka produk asal kitai Iban baka betenen, beranyam, betusukka leka manik enggau pengawa bukai,” ku Levis nerang pengawa ke tau ditapatka pengusung nyema nemuai ngagai rumah panjai sida.

NGENA MANAH PELUANG

LANDIK BA TUNJUK JARI… Siku peranak di Rumah Emak benama Menou benung betenunka pua kumbu.

Nampung randau ke dalam agi, Levis madahka teknologi digital tu besai endar guna ngagai sida serumah ke deka nguji bejual nengah chara online.

“Ba aku, mayuh endar pengelebih enggau pemanah teknologi digital dikena nyungkak penatai pemisi ruang bilik enggau rumah panjai.

“Munyi ku jaku kitai diatu neh, tekan aja sida Facebook nya sigi bemacham produk ke bisi dibantai bala pedagang.

“Tebal agi, pedagang diatu nyau bejual ari rumah aja laban muntang aja semina bekenaka media rama endur ngelakuka produk diri.

“Pedagang nyau makin maju lebih agi pengudah kena pangka pandemik Covid-19 ke udah nekul kitai ngereja pengawa baka selama lalu kitai mesti ngalih ngagai chara baru,” ku saut Levis.

Iya mega madah, kemaya hari tu, semua teknologi digital makin maju serta ba tunjuk jari magang utai diatu.

Levis madahka pengawa bekenaka teknologi digital tu ulih nyaup pedagang mit ari rumah panjai ngemujurka dagang sida.

Ukai semina nya aja, Levis madahka teknologi digital tu ulih ngerandang jalai sida serumah ngelakuka produk ngagai makit ke besai agi.

Ari nya, sida serumah bulih penguntung sereta ngangkatka produk ngagai makit ke besai agi sereta ngining makit menua luar.

“Tambah mega, kitai semina begunaka telefon pintar aja enti deka ngelakuka produk chara digital,” lu Levis madah nyemetak.

Entara produk ke suah dijual sida serumah iya nya sayur, buah (nitihka musin), minyak engkabang (nitihka musin), lada, getah, produk kraf jari baka uyut, bakul, tikai bebuah, kain burie sereta produk pua kumbu baka sirat, selampai, labung enggau ke bukai.

PUN PENATAI PEMISI

KUR… Bala peranak Rumah Emak benung kiruh ngaga kain burie ba ruai rumah panjai sida.

“Aktiviti ke suah dipejalai kami serumah nya betanamka sayur tauka dikumbai ‘sayur kibung’ laban dirungkup ngena kibung.

“Nanam sayur tu tau disema pun penatai pemisi peranak di Rumah Emak laban mayuh untung sereta mayuh orang meli ba menua kami ditu.

“Kelimpah ari betanamka sayur, bisi sekeda nya bumai, nanam lada, nupi ikan pegung, nupi manuk, itik enggau jani ngambi bisi dibunuh maya bisi pengerami di rumah panjai.

“Baka sida manuk, serati enggau ikan nya… enti mayuh sigi dijual kami serumah dikena meli umpan baru.

“Kebendar, tebal agi kami serumah ditu endang kala bejualka bemacham produk lebih agi produk pengelandik jari.

“Sema jaku, lebih 20 taun kami serumah udah bejualka bemacham produk dikena nambahka penatai pemisi ruang bilik kami,” ku iya nerang sentang chara sida serumah ngiga belanja kelimpah ari bumai enggau bekebun.

Levis sebanaka penatai pemisi sida serumah balat kusut sekumbang musin pandemik ke udah nuntung kenyau ari dua taun ke udah.

Ku iya, kebuah pia laban kadang sida enda ulih bejual ba pasar laban mesti ngasika atur sereta Atur Pengawa Standard (SOP) ke udah ditetapka perintah.

“Tang, diatu kira manah mimit laban kami serumah nyau dikemendar bejual ba pasar sekumbang SOP udah ditendur.

“Tambah mega, rumah Emak diatu udah muntang bejual pengudah bisi Facebook Pages kediri empu ke nyadi pelasar bedagangka produk chara digital,” ku Levis lantang ati laban kitai diatu nyau majak ulih ngereja pengawa baka selama seraya besampika menua kitai pulai likun.

Ba pengujung randau, dia Levis ngarapka perintah tauka raban ukai dikuasa perintah (NGO) ulih nyaup ngangkatka tikas idup sida serumah nengah pengawa ngatur kus tauka bengkel ngagai rumah panjai sida.

Kebuah pia ku iya, pengawa baka tu tau marit sida serumah sentang chara bedagang digital sereta bulih penemu baru.

Kelimpah ari nya ku Levis, pengawa bedagangka produk pengelandik jari tu sebagi ari chara sida serumah ngidupka diri kelimpah ari pengawa bumai.

Suara Sarawak