KELAI BEJADI…Simon (dua kiba) begulai enggau bala bukai mandangka papan tanda ke udah disain kelai bejadika Chapel Sacred Heart Palan Tungkul Sengayuh Sarawak, ensana.-Gambar Mohd Alif Noni

KOTA SAMARAHAN: Unit Pekara Pengarap Bukai (Unifor) merambu nirika rumah sembiang mit ba fasiliti perubat selampur menua dikena ngemuntangka sida ti bepengarap bukai besembiang.

Direktor Unifor, Richard Lon madah, diatu sida benung berandau enggau sekeda palan perubat perintah nyengkaum sepital ngambi setujuka perambu nya.

“Aku enda ulih nerang silik laban pekara nya agi dikerandau tang kami kami deka betemu enggau bala bukai ba endur bukai, pengudah ba renggat dikereja baru kami deka nerang ngagai mensia mayuh.

“Nya entara projek ke chukup manah laban menua tu diuan pupu bansa enggau jalai pengarap seriris enggau polisi inklusif dikemeran Perintah Sarawak,” terang iya.

Richard mansutka jaku nya lebuh dirandau pemberita pengudah bejadika Chapel Sacred Heart Palan Tungkul Sengayuh Sarawak, ensana.

Ku iya, rumah sembiang ungkup semua pengarap ti diperambu baka chapel tauka gerija mit nya mega ulih dikena sida ti bepengarap bukai besembiang dia.

“Nitihka utai ti dikerandau, agih belanja ungkup tuju nya deka dipelanja Perintah Sarawak nengah Unifor laban kami endang bulih agih belanja besai ninting taun.

“Agih belanja nya ukai semina dikena nyeleti rumah sembiang tang mega dikena nagga baru ungkup pengelantang komuniti,” ku iya.

Nambahka nya ku Richard, inisiatiif ke semina bisi di Sarawak tu mega keterubah dipejalai di menua tu nunjukka pemanah Perintah Sarawak nyaga pengelantang pengarap bukai.

“Batang tuju pengawa tu laban deka ngemuntangka staf, mensia mayuh di sepital tu benung ngibun pesakit besembiang enggau besampika orang ti dikesayau sida gerai.

“Tambah mega, kita ulih besembiang nadai ngira jalai pengarap laban kitai begunaka fasiliti perubat lebih agi sepital endur besembiang ungkup sida ke sakit,” terang iya baru.

Nya alai, iya ngarapka komuniti menua deka nyukung inisiatif nya deka rumah sembiang tu tau nyadi pelasar ngedut kaul rayat di menua tu.

Suara Sarawak