SIBU: Ryn’z Betta Café deka mandangka main Sape enggau Ajat Asal Iban, urung pukul 8 malam pagila, 26 March.

Pengempu palan makai nya, Korina Mang madah, tuju sida sebuat ngatur pengawa nya endang deka nyaguka main asal kitai raban bansa Dayak.

Ku iya, main asal nyadi kelai tauka identiti bansa asal ti patut dipebasa, dikeingat enggau dikemeran ngambi bisi ditampung ngagai rebak baru.

“Anang sesekali kitai ninggalka main asal ke majak lenyau diserunyut segang pemansang dunya kemaya hari.

“Sape tu udah diterima komuniti dunya. Pia mega Ajat kitai udah dikelala serata dunya.

“Nadai kebuah kitai enda ulih datai meri sukung, abis nadai nyukung pengemeran main asal bansa diri.

“Kitai mega anang enggai tauka sanggu nampung pengawa asal ngambi rebak baru enda tinggal tinjau.

“Nya alai kami ari Ryn’z Betta Cafe deka mandangka main sape enggau Ajat Asal kitai Iban malam pagila,” ku iya lebuh dirandau Suara Sarawak.

Korina madah baru, sida mega meri awak ngagai Raban Pemansang Indu muka reruai endur sida bejualka aksesori, asil kraf jari Orang Asal.

Ke penerang, raban The Rhythm of Borneo betubuh tiga iku; Zex, Albinus enggau Jimpau Balan deka merindang bala mayuh ngena Sape seraya Ajat deka dibantaika raban ari Raban Pemansang Indu.

Penerang tauka tanya silik tau telefon ngagai Komiti Pengatur, Aweq ba lumur 011-1461 9311.

Suara Sarawak