KUCHING: Sarawak terus napi penanggul suntuk pengajar kelebih agi ketegal suntuk chalun ari Palan Pematih Pengajar (IPG) enggau pengajar subjek ti enda senutuk.

Presiden Serakup Kaunsil Atur Pengawa Sekula Primari China Perintah di Bagi Menua Kuching, Samarahan dan Serian, Datuk Jonathan Chai madah, subjek ke suntuk pengajar ketegal subjek pengajar enda senutuk iya nya subjek English, Bahasa Melayu enggau Pendidikan Khas.

Ku iya, Opis Menteri Pelajar mesti nesau enggau meransang bala nembiak abis sekula masuk IPG.

Pia mega ku iya, perintah mesti bechuntoka sekeda menua maju ngambi nyendiaka kus Degree Pendidikan di palan pelajar tinggi ti dipelanja perintah ngagai nembiak ti nyulut ba peresa.

Ku Chai, tu nentuka mayuh orang pintar dilatih nyadi pengajar dikena ngangkatka pemansang dalam bidang pelajar di menua tu.

“Tang, ba penemu aku penanggul suntuk pengajar ba sekula vernakular China ambika banding, Sekula Bansa China (SJK) Chung Hua di Sarawak enda balat ngirauka enti dibanding sekula perintah aliran bukai.

“Pekara tu nyadi pengudah ngempung kelas di SKM (Sekula Kurang Nembiak), mayuh pengajar dipindah dikena ngisi pangku pengawa kusung ba mayuh SJK Chung Hua,” ku iya nerang.

Chai madah, penanggul suntuk pengajar mega engka ketegal mayuh pekara ke enda disadang baka pinchin tumu, kes pemati, kemisi setengah gaji enggau nadai gaji lebih setaun, ngulu kus lebih setaun, servis diketu enggau ngemaduka diri.

Taja pia, opis menteri mesti mutarka pekara tu enggau manah penyampau pangku pengawa pengajar ke mesti diisi lalu nadai kedalih madahka penanggul tu enda ulih diputar ba timpuh panjai kelimpah majak suntuk pengajar nyentuk beribu pengawa enda diisi.

“Enti sema penanggul tu enda ulih diputar tumu agi, nembiak ngembuan hak enggau peluang nerima pelajar bekualiti lebih agi ba menua pesisir enggau menua ulu deka dirampas enggau nadai pematut,” ku Chai madah nyemetak.

Taun nyin kemari, Sarawak diripotka suntuk 3,385 pengajar tang penyampau nya nambah ngagai 5,037 naka bulan Januari tu tadi taja 1,674 iku pengajar udah dianjung di Sarawak kenyau ari bulan Disember 2021.

Opis Menteri Pelajar madah, taun nyin kemari sekula primari di empat nengeri nyengkaum Sarawak balat napi penanggul suntuk pengajar.

Chai madah, Opis Menteri Pelajar udah ngatur pengawa ngambi mayuh pengajar iya nya 18,702 iku ba bulan Julai 2021 ngambi pengajar baru ulih dianjung gawa kena Oktober 2021 dikena mutarka penanggul suntuk pengajar ba sekula primari tu.

“Tang, perambu nya enda lanchar dipelaba baka disangka aku. Ari penyampai peminta, semina 13,760 ti mujur dalam intebiu diatur Komiti Besai Servis Pelajar.

“Ari penyampau nya, kitai nemu sekula deka terus napi penanggul suntuk pengajar lebih agi sekula di menua pesisir enggau menua ulu lebuh pengajar nya enggai ngeripot diri gawa,” ku iya nerang silik.

Suara Sarawak