NGEDUT KAUL… Usmanov enggau Abang Johari begambar ungkup kenang lebuh penemuai basa nya.-Japen

KUCHING: Duta Besai Republik Uzbekistan Ke Malaysia, Ravshan Usmanov udah ngatur pejalai nemuai meri basa ngagai dua ketuai Sarawak, kemari.

Penemuai nya beserimbai enggau pejalai gawa ngagai Sarawak pengelama dua hari bepun kemari.
Dulu ari nya, iya udah nemuai ngagai Tuai Pemegai Menua (TYT) Tun Pehin Sri Abdul Taib Mahmud di Demak Jaya ngambi berandauka kerejasama entara Sarawak enggau Wilayah di Uzbekistan.

Sama datai Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah ke mega menteri pengiring, Kaunselor Ekonomi Duta Uzbekistan Mahmud Mahmudov enggau Sekretari Kedua Duta Uzbekistan, Elbek Saidov.

Udah nya, iya nemuai ngagai Premier Sarawak Datuk Patinggi Tan Sri Abang Johari Tun Openg di Wisma Bapa Malaysia.

Bejaku ngagai pemberita pengudah penemuai basa nya, Usmanov madahka pengawa betemu enggau Premier Sarawak nya laban deka nanggam kerejasama entara Uzbekistan enggau Sarawak mungkur bidang ekonomi, dagang, pekara pelajar enggau dagang temuai.

Ngelansa pekara ke sama, nitihka penerang ari sebengkah portal dalam menua tu madahka Uzbekistan bisi ata deka bekerejasama enggau Sarawak ba sektor betanam betupi.

Nitihka penerang ari Usmanov menua Uzbekistan benung ngiga makit baru dikena ngerembaika kerejasama ekonomi lalu Malaysia dipilih ungkup ngemujurka juluk nya beduduk ari penau besai ke dikembuan menua tu.

“Sarawak enggau menua kami (Uzbekistan) ngembuan juluk ke sebaka ngerandangka pemansang ba pengawa ekonomi nyengkaum ba pengawa digital,” ku iya.

Ungkup penemu Usmanov, 43, berengkah gawa nyadi Duta ke Malaysia kena Mei 2018.

Suara Sarawak