AYUN LUNDAI… Bala penyereta bela mantaika pengelandik diri ngajat sereta ngerasuk ngepan Iban enggau Orang Ulu.

MAI rebak biak angkunka main asal bansa Iban enggau Orang Ulu entara tuju Serakup Indu Dayak Sarawak (SIDS) Pampang Kapit ngatur kelas ngajat Iban enggau Orang Ulu.

Nya kebuah, Pengawa Nutup Kelas Ngajat Iban enggau Orang Ulu tu udah dipenyadi Adun Bukit Goram Jefferson Jamit Unyat, apin lama ke udah.
Lebuh bejaku bejadika pengawa nya, Jefferson madahka diri berasai temegah meda inisiatif dipejalai SIDS Pampang Kapit ti keran nyaguka adat enggau main asal komuniti Dayak.

“Pengawa baka tu ngayanka kitai sedarka pangka pemansang ba adat enggau main asal.

“Adat enggau main asal tu deka majak lenyau enti semina diteju pia aja ketegal diserunyut arus pemansang ngujungka komuniti Dayak empu deka lenyau identiti.

“Nitihka penerang, kelas tu mega dipasuk komuniti Melayu enggau China di Bagi Menua Kapit.

“Ditu kitai sedarka pemesai guna adat enggau main asal dikena nyerakupka pupu bansa di Sarawak.

NGANSAH PENGELANDIK

“Kelas ngajat baka tu endang program ke chukup manah dikena ngansah pengelandik semua nadai ngira biak tauka tuai.

“Program baka tu sebagi ari chara kitai ngetanka main asal ngambi enda lenyau ketegal arus pemansang.

“Tu mega chara kitai matak rebak biak sama angkunka main asal baka ngajat Iban enggau Orang Ulu laban sida ke dikeandal kitai nali pengelandik asal tu,” ku Jefferson nerang.

Pia mega, ba program nya, Jefferson udah nyuaka agih belanja Projek Mit Pemansang Menua Pesisir (MRP) penyampau RM10,000 ngagai SIDS Pampang Kapit.

Jefferson ngarapka agih belanja nya ulih mantu SIDS Pampang Kapit ngatur bemacham aktiviti lebih agi bekaul pengawa nyaguka main asal.

NERIMA SUKUNG

Ba lansa sama, Chairperson SIDS Pampang Kapit, Annie Anthony Belikau madah, batang tuju ngatur Kelas Ngajat Iban enggau Orang Ulu tu endang dekaka nembiak rebak baru tauka orang lama meruan ingatka tanda ke betul ti dibai ari asal kelia.

“Kelas ngajat tu mega dikena mai semua penyereta ngembuan runding deka ngenanka main asal dataika tubuh uchu ichit jemah ila.

“Kami mega keran ngenan sereta nyaguka main asal tu ngambi enda lenyau dibai peneras pemansang dunya.

“Nyadi, rambau Kelas Ngajat Iban enggau Orang Ulu empai lama, kami nerima 84 iku penyereta.

“Timbal ari bala penyereta chukup manah laban ukai semina bansa Iban enggau Orang Ulu aja datai deka belajarka ajat tu.

“Tang kami mega nerima penyereta ari bansa bukai baka China enggau India.

“Chukup temegah ati laban bisi bansa bukai rindu deka belajarka ajat Iban enggau Orang Ulu,” terang Annie.

Nambahka nya, bemacham bansa ajat Iban enggau Orang Ulu bisi diajar raban ari SIDS Pampang Kapit tu.

Ba Ajat Iban, sida bisi ngajar Buka Ajat, Bungai Ajat, Titi Tiong enggau Burung Terebai.

Ba Ajat Orang Ulu, sida bisi ngajar tanda Ngala Ujo’ Tak ta’u Ngan tak, Ngala Ujo’ Tai ka’ tena, Ngala Ujo ‘ Ngedut ka” Baya’ enggau Tu’ut Ngelupa.

NGETAN MAIN ASAL

Annie mega madah, dudi hari sida deka ngatur kelas belajar betabuh enggau begendang, bepantun, bebiau, betenun enggau ke bukai.

“Pesan aku nuju rebak biak, kita mesti ngembuan ati ti bebasaka main asal bansa diri sereta ransing deka nyaguka ajat tu ngagai tikas ke agi kelebih agi ba tikas dunya.

“Sama mih kitai bansa Dayak keran ngetanka main asal diri sekalika nya rebak biak tauka lama ngambi enda anyut dibai peneras pemansang dunya.

“Enti ukai diatu, kemaya agi, enti ukai kitai sapa agi?” ku Annie meransang semua kitai bela angkunka pengeraja asal lebih agi adat enggau main asal.
Ungkup penerang semua, SIDS Pampang Kapit tu ditumbuh Toh Puan Sri Tiong kena 13 Ogos 1965.

Naka diatu, SIDS Pampang Kapit udah dipasuk 8,890 iku lalu bisi 16 unit sereta SIDS Kapit diatu dipegai Rheineld Minor Panyau.

NGANSAH PENGELANDIK… Jefferson nyuaka setipikit ngagai siku ari penyereta Kelas Ngajat Iban enggau Orang Ulu diatur SIDS Pampang Kapit, apin lama ke udah.

Suara Sarawak