TUPI MAYUH UNDANG… Rundi (tiga kiba), Sim (empat kiba) enggau Martin (dua kanan) nunjukka undang ti ditupi di Taman Akuakultur Loba Stoh, Lundu, ensanus.

LUNDU: Opis Menteri Betanam Betupi Moden enggau Pemansang Wilayah keran ngangkatka sitak Rambungan Loba Stoh nyadi Zon Industri Akuakultur.

Menteri iya, Datuk Seri Dr Stephen Rundi Utom madah, tu dikena nyaup nyapai tagit Sarawak nyadi palan tibang pemakai nyengkaum nambahka penatai pemisi RM1 bilion nengah pengawa nupi undang manggai taun 2030.

“Perambu kami deka ngerembai enggau nambahka palan nupi undang komersial abis nadai 7,000 hektar.

“Diatu semina 300 hektar tanah di Sarawak nyadi pegung nupi undang, penyampau nya agi jauh dibanding Sabah enggau Perak ke ngembuan urung 1,000 hektar,” ku iya.

Rundi mansutka jaku nya pengudah ngabas palan nupi undang Sea Horse Coporation di Taman Akuakultur Loba Stoh, Lundu, ensanus.

“Sitak tu mayuh tanah puang lalu utai ke diguna diatu nya ngemanah infrastruktur baka jalai alun, bekal ai enggau kuasa karan.

“Nya kebuah, Perintah Sarawak besemaya deka terus meri sukung lalu beratika pekara tu lebuh mantu pemain industri bekaul nyendiaka kereban ti diguna,” ku Rundi nerang.

Nambahka nya ku iya, sitak nya mega bisi pengulih enggau strategik diangkat nyadi taman industri undang enggau penyauh pejalai semina sejam ari Pasar Kuching.

“Reti iya, ari sukut perengka pengangkut enggau ke bukai nya ukai nyadi penanggul.

“Aku mega muji pengawa pemain industri ngemansangka sitak tu pengelama betaun taja lebuh nya nadai perengkaguna penuh.

“Sida ngembuan juluk besai deka ngemansangka bidang akuakultur taja nyau ngena belanja urung RM250,000 setaun dikena ngemanah bekal kuasa karan,” ku iya nerang silik.

Nangkan nya, Rundi nesau mensia mayuh ti minat ngaul diri ba pengawa nupi undang tau telefon tauka datai ngagai opis menteri laban sida seruran ngelaluka pemain industri nya.

“Kitai mesti ngubah palan tu nyadi taman akuakultur sereta ngemansangka bekal industri ari pengawa nupi jelu nyentuk diproses,” ku iya madah nyemetak.

Sama datai Sapit Menteri Betanam Betupi Moden enggau Pemansang Wilayah, Martin Ben enggau Menijar Loba Stoh Agriculture Sdn Bhd Sing Ing Jye.

Suara Sarawak