DATUK SERI DR. STEPHEN RUNDI

KUCHING: Atur Pengawa Standard (SOP) ti disediaka ungkup aktiviti munaska jelu sakit deka terus dititih dikena nagang pengerekai penyakit Tabin Jani Afrika (ASF).

Menteri Betanam Betupi Moden Enggau Pemansang Kandang Menua Datuk Seri Dr. Stephen Rundi Utom madahka opis menteri iya nerima manah perambu Kaunsil Mengeri Sibu (SMC) ti nguna chara nunu bangkai jani.

Taja pan ku iya, chara tu engka nelan ungkus belanja ti tinggi enggau enda entu praktikal enti meda ngagai penyampau jani ti dipunaska kelalu mayuh.

“Aku deka madahka ngagai Opis Servis Veterinar Sarawak awakka terus nguna SOP ti udah bisi ungkup pengawa nagang penyakit ASF tu ari terus ngerekai.

“Nitihka SOP Gerah Tetap Veterinar, DVS Malaysia ti dikeluarka Putrajaya, udah aktiviti munaska enggau meresi premis ti dirampit, premis nya mesti dilakka puang sepengelama 40 hari sebedau jelu dibai tama,” ku iya dalam siti penerang media, kemari.

Tandu iya, virus ASF tu ulih ngerekai dibai angin dalam timpuh ti panjai.

Nya alai, iya ngarapka raban ti diruga bekau ari atur nutup tu besabar ungkup timpuh sementara.

Ku Rundi, aktiviti munaska jani udah dipejalaika ngagai dua dandang jani ti dirampit di Sibu ngaul 764 iku jani di Batu 11 Jalai Oya enggau Tanjung Kunyit.

“Nya alai, rumah endur netak jani SMC di Sibu semina ulih beroperasyen pengudah aktiviti sanitasyen, dekontaminasyen enggau pemuang premis tembu digaga.

“Bagi nampung peminta jam diatu, dagin jani ulih dibeli ari Kuching enggau dijamin chukup bagi peminta kandang menua,” ku iya.

Nangkan nya, Rundi mega meri terima kasih ngagai pengari rayat, mensia mayuh enggau semua ejensi ti udah meri tulung nagang pengerekai penyakit ASF di Sibu.

Iya mega ngelalau semua penupi jani di Sarawak terus bejaga sereta nambahka bio-sekuriti dandang diri empu nyeliahka dandang jani sida dirampit penyakit ASF.

Ku iya, entara pekara ti patut diperatika iya nya enda meri laluh pemakai dapur lalu enti jani makai laluh sayur, sayur nya mesti disumai pengabis nadai 30 minit dikena munuh igi penyakit ASF.

Ku iya, dagin jani ti bisi ba pasar endang likun diempa laku opis menteri nengah DVS deka ngambi semua penerang enggau perembu ari semua raban dikena nyeliahka enggau mutarka penyakit nya ba maya ti deka datai.

Suara Sarawak