KUCHING: Menteri Pengerai Mensia Mayuh, Pengawa Berumah enggau Kaunsil Kandang Menua, Datuk Seri Dr. Sim Kui Hian ngelalau apai indai nganjung anak sida beumur lima ngagai 11 taun nerima vaksin.

Ku Dr Sim, ngenang ba taun 2020 mayuh orang nganti nerima vaksin tang diatu nyau vaksin ke nganti mensia mayuh.

“Nya kebuah, mensia mayuh mesti bejalaika tanggung pengawa munaska igi penyakit Covid-19 lebih agi varian Omicron,” terang iya di Facebook, sehari tu tadi.

Terang iya, sepenyampau 54,000 dos vaksin Covid-19 bansa Pfizer BioNTech ungkup anak mit beumur lima ngagai 11 taun udah datai ba Padang Bilun Entarabansa Kuching (LTAK), lemai tu tadi.

Iya meri terima kasih ngagai Menteri Pengerai Malaysia, Khairy Jamaluddin, Opis Menteri Pengerai Malaysia (KKM) enggau Raban Staf Khas Imunisasyen Covid-19 (CITF) laban udah bekerejasama nentuka PICK enggau PICKids lanchar dipejalai.

“Pia mega, terima kasih ngagai bala pengajar, apai indai enggau nembiak laban enti nadai kerejasama ari sida, vaksinasyen di Sarawak enda ulih lanchar dipejalai lalu diatu nyau deka nerima dos kedua,” terang iya baru.

Nitihka penerang ba website CovidNow KKM, tikas vaksinasyen Covid-19 Sarawak ungkup anak mit beumur lima ngagai 11 taun nambah mimit ngagai 60.6 peratus kena Hari Empat tu tadi.

Sarawak mengkang ba penuduk pemadu atas bepelasarka tikas vaksinasyen Covid-19 di Malaysia ungkup renggat umur nya.

Tikas vaksinasyen nasional ungkup anak mit naka sehari tu tadi iya nya 30.9 peratus.

Nambahka nya, tikas vaksinasyen nembiak beumur 12 ngagai 17 di Sarawak udah nyapai 90.5 peratus iya udah nerima abis nadai dua dos vaksin Covid-19.

Datuk Seri Dr. Sim Kui Hian

Suara Sarawak