Martin Ben (tengah) benung mendingka penerang ari siku pengari ke ngambi bagi ba Program Ekspo GardenScapes Sarawak, kemari. Bela bisi dipeda Tuai Pegawai Eksekutif Mona Abdul Manap (kanan), Direktor Pengatur Pengawa Aquavermiponic Sdn. Bhd. Amelia Lim, Tuai Pegawai Eksekutif Program Dagang Sarawak Amelia Roziman enggau Mandal Chanselor Pro Kampus UCSI Kuching Mukhvinder Kaur Sandhu.-Gambar Ramidi Subari

KUCHING: Peranak menua diperansang nguna manah sektor betanam betupi laban sektor tu ngembuan peluang besai ngagai Pemansut Kasar Dalam Menua (KDNK).

Sapit Menteri Betanam Betupi Moden Enggau Pemansang Kandang Menua ll Martin Ben minta semua orang ngaul sektor tu nitihka pengulih diri empu enggau bidang ti deka dikaul.

“Naka diatu, semina sektor minyak sawit aja ti meri penatai besai ngagai sektor betanam betupi menua.

“Nya alai, aku ngarapka produk betanam betupi bukai di menua tu ditambah awakka betanam betupi ulih nyadi sebagi ari KDNK besai ngagai Sarawak,” ku iya.

Iya bejaku munyi nya rambau bejadika Program Gardenscapes Sarawak 2022 di sebuah palan bebeli barang, ditu kemari.

Ku iya, dagang betanam betupi enggau nupi jelu amat beguna awakka Sarawak ulih nyadi pengeluar pemakai ti bekualiti sereta enda bepanggai ngagai pemakai import.

“Nuju sida ti deka nemu pasal sukut dagang betanam betupi, perintah nengeri nyendiaka mayuh geran enggau pinjau dikena mantu sida numbuhka dagang.

“Perintah pechaya sereta nyukung raban orang bumai tauka betanam ulih nambahka penatai pemisi dikena ngemanahka tikas pengidup sida.

“Tu deka meri empas ti manah ngagai ekonomi sida empu sereta pengerembai ekonomi,” ku iya.

Suara Sarawak