KUCHING: Raban Indu Opis Polis Pelilih (IPD) deka terus gawaka komuniti enggau menua seriris enggau rambai jaku ‘Perkhidmatan Diterima dan Dirasai’.

Tuai Polis Pelilih Kuching, Asisten Komisioner Ahsmon Bajah madah, pangku pengawa polis maya ngalih ngagai endemik tetap sama baka ejensi penerit adat bukai nentuka inisiatif Perintah Sarawak nagang pengerekai igi penyakit Covid-19 tejapai.

“Kami deka bejalai sereta neritka Atur Pengawa Standard (SOP) ngambi nagang pengerekai igi penyakit dalam komuniti enggau lengkas.

“Ungkup pekara ke lebih besai, kami deka nyendiaka servis pemadu manah lalu ngarapka sida ulih nerima servis nya,” ku iya.

Ahsmon mansutka jaku nya lebuh dirandau pemberita pengudah bejadika Pengawa Ngintu Hari Polis ke-215, di padang kawad IPD Kuching, kemari.

Iya mega sempat nibarka jaku pesan ngagai semua pegawai polis ke bisi datai ba pengawa nya.

Ku Ahsmon, bepelasarka rambai jaku ‘polis dan masyarakat berpisah tiada’, raban polis seruran sedia ngesan tanggung pengawa ungkup pengelikun komuniti enggau menua.

Nya kebuah ku iya, pengawa tu mesti ditampung ngagai ulih diajar ngagai pelapis Sang Saka Biru maya gawaka menua dudi hari.

Nambahka nya, bisi 25 iku pegawai diberi setipikit kelai ngenang jasa sida ke udah bebendar gawa beserimbai enggau hari polis tu.

Pia mega, bisi lima iku ex-pegawai diberi setipikit kelai ngenang jasa sida udah lama gawaka menua.
Ba pengawa ngintu hari polis, raban Kawalan Hormat bisi ngatur engawa bebaris iya nya 48 iku raban pangkat baruh betuaika ASP Mohamad Qafie Taib.

Sama datai Sapit Tuai Polis Pelilih Kuching Superintendan Merbin Lisa.

DINGA MANAH… Tuai Polis Pelilih Kuching, Asisten Komisioner Ahsmon Bajah benung bejaku ba mua raban polis IPD Kuching

Suara Sarawak