KUCHING: Skrip Teater ‘Had 60’ ditulis Khairul Amin lalu dikemujurka direktor Qadry Basri udah nyadi pelasar ti pemadu manah endur peranak menua ngayanka penau sida.

Sapit Menteri Dagang Temuai, Industri Kreatif Enggau Seni Pemerindang ll Datuk Snowdan Lawan madahka iya muji raban pelakun enggau produksyen teater tu seraya madahka rayat Sarawak sigi endang ngembuan mayuh penau.

“Aku berasai teperindang sereta gaga meda teater nya tadi (malam 26 March), lalu aku berasai temegah meda bala pelakun ti mandangka penau diri nyadi pelakun.

“Aku pechaya agi mayuh rayat Sarawak ti ngembuan penau baka tu ti bedau ditemu kitai, nya alai nengah teater baka tu meh pelasar ti manah endur kitai narit sida mansang ke mua,” ku iya.

Snowdan bejaku munyi nya pengudah meda teater ‘Had 60’ ba Balai Main Asal Dewan Bahasa dan Pustaka (DBP) ditu, malam tadi.

Ku iya, opis menteri seruran meri sukung ngagai pengemeran kreatif kelebih agi raban nembiak ngayanka penau sida dalam bidang seni.

Iya madahka, belakun ba teater ukai pekara ti muntang laban sida mesti ingat ke gintir diri sereta enda ulih ngaga penyilap laban chara belakun nya dipanchar terus ngagai orang ti meda.

“Nengah chara teater ti dipancharka terus ba media rama ungkup orang diluar din meda, kitai andalka sida bukai ulih teperansang sereta beminat ngaul diri ngambi peluang dalam bidang tu,” ku iya.

Teater ‘Had 60’ ngayanka pelakun biak iya nya Farhanamuhd, Khairul Amin, Milyana Arshad, Tini Tyrani, Nur Haziyah Fatin enggau Rezzqy Hakim.

Teater tu mega diatur Kelab Belia Permata Halaman Kurung Sian (Berlian) Sarawak, disukung Opis Menteri Dagang Temuai, Industri Kreatif Enggau Seni Pemerindang, DBP enggau Opis Main Asal enggau Seni (JKKN) Sarawak.

Snowdan (sembilan kiba) begambar enggau bala pelakun teater ‘Had 60’ ba Balai Main Asal Dewan Bahasa dan Pustaka (DBP) ditu, malam tadi.

 

Pelakun teater ‘Had 60’ benung melakun ba atas pangau.

Suara Sarawak