NERANG…Wan Junaidi (duduk) benung nyaut tanya pemberita pengudah Program Begulai enggau Rayat di Kampung Tanjung Bako ditu, kemari. -Gambar Ramidi Subari

KUCHING: Tiga buah genturung pendiau di Bako iya nya Kampung Tanjung Bako, Kampung Pinggan Jaya enggau Kampung Muhibah diperambu deka ditangkir enggau palan pengentap baru.

Menteri ba Opis Menteri Besai (Parlimen enggau Undang-Undang) ti mega Kaban Parlimen Santubong Datuk Seri Dr Wan Junaidi Tuanku Jaafar madahka tiga buah kampung tu ngembuan urung 3,000 iku peranak.

“Penyampau peranak ti mayuh tu endang nyadi penanggul laban perintah ulih muka lot tanah palan pengentap baru ngagai sida ti nadai palan ari genturung pendiau bukai kitu.

“Palan tu ila deka ditangkir enggau genturung pendiau seberai nuju ke Muara Tebas laban projek ngaga jematan nuju kin ba baruh Perintah Nengeri udah dikemendar,” ku iya.

Wan Junaidi madah munyi nya ngagai pemberita rambau Program Begulai enggau Rayat di Kampung Tanjung Bako ditu, kemari.

Ku iya, nyema jematan nya tembu ila, Kampung Tanjung Bako deka ulih terus besambung enggau Kuching, ukai nengah jalai ari Kota Samarahan agi.

“Lebuh nya nyadi ila, palan tu deka napi ubah dinamik ti baru kelebih agi pemansang palan ditu.

“Enggau nya, peluang nembiak rebak baru dalam dagang enggau ke bukai majak manah.

“Laban enti diatu kitai nguna 40 minit ketegal jalai sekut enggau penanggul bukai, tang nyema nengah jematan penyauh ari ditu ke Kuching semina 15 minit aja,” ku iya.

Nya alai, iya madahka produk peranak menua dia deka muntang agi datai di Kuching.

“Pekara tu udah dikenataika ngagai aku ari Perintah Nengeri, lalu aku ngarapka pengawa nya diteruska.

“Aku empu deka berandau enggau Premier Sarawak bekaul pekara tu ila,” ku iya.

Wan Junaidi kemari mega madah, iya sempat ngabas empat buah ruang bilik ti ditinggang penusah rumah angus apin lama lalu iya madahka deka ngentak baru rumah sida enggau agih belanja ari Palan Servis Parlimen Santubong penyampau RM50,000 nengah kereja beripai.

Kelimpah ari nya, iya mega madahka Perintah Besai udah ngemendarka agih belanja RM3.6 juta dikena ngaga baru sebuah masjid di Kampung Tanjung Bako.

Pekara nya, ku iya laban masjid lama ke digaga ba taun 1980-an ngujungka gamal masjid ke beumur manggai 40 taun nya udah balat repuk.

Suara Sarawak