MERESA BARIS… DCP Mancha Ata (tengah) benung meresa baris beserimbai enggau Pengawa Ngintu Hari Polis ke-215 ba Renggat Kontinjen Sarawak di Indu Opis Polis Kontinjen (IPK), kemari.

KUCHING: Tikas indeks penyalah di Sarawak nurun 188 kes tauka 19 peratus ungkup tiga bulan keterubah taun tu dibanding timpuh ke sebaka taun nyin tadi.

Pemangku Kepala Polis Sarawak, DCP Datuk Mancha Ata madah, kes penyalah di menua tu ba tikas agi ulih ditagang.

Ku iya, ari 1 Januari nyentuk 19 March tu tadi, 799 kes penyalah indeks diripotka dibanding 987 kes ba timpuh ke sebaka taun nyin tadi.

“Taja timpuh tiga bulan keterubah taun tu kes nurun tang kami naka ulih ngurangka indeks kes nya dibanding taun nyin tadi nengah bemacham pelin enggau operasyen ti udah diperambu dikena nagang penyalah terus nyadi,” ku iya.

Mancha mansutka jaku nya lebuh bejaku beserimbai enggau Pengawa Ngintu Hari Polis ke-215 ba Renggat Kontinjen Sarawak di Indu Opis Polis Kontinjen (IPK), kemari.

Ku iya, kes penyalah komersial ditemu nambah 126 kes (27.4 peratus) iya nya 585 kes ba timpuh 1 Januari ngagai 20 March taun tu dibanding 459 kes diripotka ba timpuh sebaka taun nyin tadi.

Iya madah baru, RM16.5 juta pengerugi diripotka ba timpuh ti sama ungkup taun tu seraya RM12.8 juta pengerugi diripotka taun nyin tadi.

Ku Mancha, pengerugi mungkur penyalah komersial di menua tu nambah RM3.7 juta tauka 28.90 peratus.

“Inisiatif dipejalai Opis Pansik Penyalah Komersial (JSJK) Sarawak ari bulan Januari nyentuk 20 March tu tadi mujur nangkap 215 iku.

“Bisi 375 iku nyengkaum 15 kes ba taun nyin tadi udah dituduh ba kort.

Pengawa nuduh nya ngaul 330 keretas pansik lalu semua 585 keretas pansik enggau penyampau pengawa nuduh nya 56.41 peratus,” ku iya nerang silik.

Bekaul kes penyalah narkotik, iya madahka pengawa nangkap kategori pengidar dadah udah nambah 15.81 peratus lalu bisi 161 iku diripotka ditangkap kena 1 Januari ngagai Februari tu tadi dibanding 161 iku ditangkap ba timpuh ti sama taun nyin tadi.

Nangkan nya ku iya, ba kategori ngembuan dadah, penyampau orang ditangkap nambah 28.14 peratus iya nya 428 iku ditangkap dibanding 334 iku ditangkap taun nyin tadi.

Mancha madah, kes aksiden ungkup timpuh 1 Januari nyentuk 20 March tu tadi mega nambah 553 kes tauka 19 peratus dibanding ba timpuh ti sama taun nyin tadi.

Ku iya, taun nyin kemari semina ngerikod 2,909 kes aksiden dibanding 3,462 kes taun tu.

Mancha mega madah, kes aksiden nambah laban entukar ti betengahka jalai alun nambah pengudah Sarawak ngalih ngagai renggat empat Pelin Penyuman Menua (PPN) bepun 3 Januari tu tadi.

“Tang seriris enggau nya, Opis Pansik Penerit Adat Trafik (JSPT) Sarawak udah nambahka 178 operasyen ke alai nambah 19 operasyen tauka 12 peratus dibanding timpuh ti sama taun nyin tadi iya nya 159 operasyen udah dipejalai.

“Saman ari asil operasyen mega nambah ngagai 10,120 saman tauka 118.6 peratus iya nya 1,8654 saman udah dikeluar taun tu dibanding 8,534 saman ba taun 2021,” ku iya.

Nya alai, Mancha madahka Opis Pansik Penyalah, Komersil, Narkotik enggau Trafik Kontinjen Sarawak dipinta terus chakah bejalaika pengawa nyentuk ujung taun tu ngambi ulih nambahka penyulut Polis Kontinjen Sarawak.

Suara Sarawak