Tiong jampat lelak pengudah kena rampit Omicron
DATUK SERI TIONG KING SING

KUCHING: Pengudah kena rampit Covid-19, diatu aku sedar berega amat pengidup tu, ku Kaban Parlimen Bintulu Datuk Seri Tiong King Sing.

Tiong madah diri kena rampit Covid-19 kena 20 Februari tu tadi madah chukup lain asai pengudah berapa hari kena rampit taja engka mensia mayuh ngumbai varian Omicron nadai raya.

“Aku berasai enda nyamai lalu ukai sakit baka selama. Mayuh pemedis enggau kelai ngujungka aku jampat lelak.

“Tang nasip amat laban aku dijaga staf perubat. Diatu aku udah berinsur gerai sereta ulih ngereja pengawa baka selama,” ku iya bekunsika peneleba kena rampit Covid-19 di Facebook, kemari.

Tiong ke mega Adun Dudong meri terima kasih ngagai sida ke irauka pengerai iya nyengkaum nyuaka bantu baka pemakai enggau ubat sekumbang kuarantin.

“Taja udah berinsur gerai enggau abis kuarantin tang ati aku agi enda nyamai asai, aku gaga tang bisi asai irau laban kes positif di Bintulu sehari tu 82 kes.

“Nitihka penerang, kes tu bepun ari aktiviti rama baka pengerami makai lemai engau ke bukai. Reti iya mensia mayuh nadai agi bejejaga ari igi penyakit tu baka dua taun ke udah.

“Nya kebuah, aku ngarapka mensia mayuh bejejaga lalu anang telunga-lunga sereta semampai nitihka Atur Pengawa Standard (SOP) laban Covid-19 tu amat nyadi,” terang iya.

Iya nyemetak madah, ukai bereti kitai kebal ari igi penyakit taja SOP majak ditendur lalu rayat udah nerima vaksin dos pengalak.

“Engka kelai tu enda raya baka sida ke enda nerima dos pengalak tang kitai tetap bejejaga laban nasip kitai enda sebaka.

“Penerang ari Opis Menteri Pengerai Malaysia (KKM) madahka lebih 40 kes pemati niting hari, kes nembiak positif nambah 160 peratus seminggu.

“Pemadu ngenyinuka ati lebuh siku nembiak indu beumur 10 taun di Sibu bebadi nyawa ketegal igi penyakit nya.

“Siku siku bala, diri sebilik pegi ninggalka kitai. Agi ga kita enda pechayaka igi penyakit tu ulih nabanka nyawa dalam beberapa hari aja?” ku tanya Tiong.

Nya alai, iya ngelalau mensia mayuh anang begelumu lalu enti nadai kebuah bukai, diau aja ba rumah lalu anang ngelawa endur ke sekut.

Suara Sarawak