KUCHING: Peranak Malaysia dipinta nukar adres ba tingki nitihka endur sida diau diatu dikena nentuka pengawa ngundi maya bepilih muntang agi dipejalai.

Menteri ba Opis Menteri Besai (Parlimen enggau Undang-undang) Datuk Seri Wan Junaidi Tuanku Jaafar madah, pekara nya beguna amat ngambi nadai penyarut nyadi ba palan ngundi lebih agi ngaul Undi18.

Ku iya, Pengawa Bepilih Nengeri (PRN) Johor nya pengawa bepilih keterubah ngaul Undi18.

Pia mega, Wan Junaidi madahka sida enda nemu silik pasal penanggul ke nyadi.

“Taja pia, bekaul adres dalam tingki nya mesti ditukar nitihka endur kita diau diatu enti sema kita pindah lalu anang ngena adres lama.

“Nya kebuah, aku ngelalau peranak Malaysia ngaga ripot nukar adres ngagai Opis Pengerejister Bansa (JPN) ngambi penerang tu ulih dipadah ngagai Komiti Besai Pengawa Bepilih (SPR) chara otomatik.

“Lalu palan ngundi kita mega deka drejister ngagai adres baru (pemadu baru),” terang wan Junaidi ba aum pemberita pengudah Program Begulai enggau Rayat di Kampung Tanjong Bako, kemari.

Nambahka nya ku iya, enti adres ba tingki nya di Kuching tang nyau berundang ngagai Kuala Lumpur laban gawa din.

Ku Wan Junaidi, baka iya empu, palan ngundi tetap di Kuching ukai Kuala Lumpur.

“Enti sema kita ulih berundang nya nadai penanggul tang enti sida ke enda ulih berundang naggai endur bukai, tu tau ngeruga penyampau pengundi.

“Nya alai, beguna endar kita nukar adres ba tingki nitihka endur kita diau enggau ke bukai,” terang iya.

Ba lansa sama bekaul siku indu ke ringat nengah video ke ayan sebelah media rama pasal palan ngundi ditutup pukul 2 lemai, Junaidi madah, timpuh palan ngundi nya dibuka enggau ditutup udah digazet.

Ku iya, pekara nya udah dipadah ngagai semua orang nyengkaum chalun enggau mensia mayuh sebedau tu.

“Palan ngundi nya semina bisi 170 iku pengundi lalu digazet ditutup 2 lemai.

“Pengudah pukul 2 lemai, pagar ditutup lalu enda ulih dibuka baru taja bisi pengundi baru datai ba luar pagar.

“Nya alai, SPR nadai ngereja penyalah undang-undang lebuh nutup palan ngundi nya tumu agi,” ku iya nyemetak madah.

Dulu ari nya, chalun PKR di Dun Layang-Layang, Dr Maszlee Malik udah madahka luyar sida deka ngaga ripot polis enggau ningkah pekara nya.

Wan Junaidi nyemetak madah, iya nadai penanggul pasal ripot laban nya endang udah budaya di Malaysia, enti bisi salah orang deka ngaga ripot ngagai polis.

“Ba aku, pekara nya nadai nyadi penanggul laban SPR udah bejalaika tanggung pengawa sida nitihka utai ke udah digazet,” terang iya.

Suara Sarawak