DATUK HASBI HABIBOLLAH

MIRI: Bisi 132 iku anak staf Raban Bekuasa Pemansang Pekebun Mit Getah (Risda) Sarawak enggau Sabah bela nerima RM200.

Sapit Menteri Pemansang Menua Pesisir, Datuk Hasbi Habibollah madahka nya Pemeri Khas Bantu Besekula enggau Insentif Pelajar Staf ngagai staf Risda Sarawak enggau Sabah.

“Risda nengah Yayasan Risda, siti ari serikat di baruh Kumpulan RISDA Holdings (KRH) ditumbuh ngambi nyeriris enggau ngatur aktiviti Tanggungpengawa Rama Korporat (CSR) Risda.

“Tu nyengkaum bantu pelajar staf Risda empu tauka anak staf Risda ke agi besekula,” ku Hasbi.

Hasbi mansutka jaku nya ba Anugerah Servis Nyulut (APC) Risda Nengeri Sarawak Taun 2021, apin lama ke udah.

Tambah mega ku iya, Yayasan Risda udah ngagihka belanja RM13,000 mungkur 65 iku anak staf Risda Nengeri Sarawak.

Pia mega, sepenyampau RM13,400 diagih ngagai 67 iku anak staf Risda Nengeri Sabah ke alai tiap penerima bela nerima RM200.

“Sama mega ungkup staf Risda Nengeri Sarawak enggau Sabah ti nampung pelajar ngagai tikas tinggi, Yayasan Risda mega nyendiaka Insentif Pelajar Khas penyampau RM500 siku dikena mayar ungkus belajar sida,” ku iya.

Bisi tiga iku staf Risda Sarawak enggau empat iku staf Risda Sabah ti nerima insentif ba pengawa nya.

“Engka penyampau nya mimit aja tang kami ngarapka pemeri enggau insentif nya ulih nyaup ngelempung belanja dikena kita nampung pelajar,” ku Hasbi nerang.

Ngelansa APC Risda Nengeri Sarawak 2021, iya madahka bisi 17 iku staf udah dipilih nerima APC Taun 2021.

“Nitihka penerang, sida nya ngarika siku penerima ari Raban Pengatur Pengawa enggau Profesional seraya 16 iku agi ari pegawai Raban Pengatur Pengawa,” ku iya nerang baru.

Ku Hasbi, perintah naka ulih ngaku pemanah budaya kereja enggau jasa staf lebuh nyendiaka bemacham anugerah enggau insentif.

Nya kebuah, Hasbi ngarapka anugerah nya ulih nyadi peransang ngagai raban staf bebendar agi gawa nambahka produktiviti enggau kualiti kereja.

“Pekara tu nentuka perintah meruan nyendiaka servis pemadu manah sereta dikeandal rayat lalu nitihka peminta sida.

“Pengawa ngaku kereja sida tu mesti nempa pengawa besemekih ke manah enggau pangan diri ngambi mantaika penau diri nyendiaka servis pemadu manah,” ku iya.

Suara Sarawak