PADAWAN: Opis Servis Kaban Parlimen (MP) Puncak Borneo udah melanja 58 iku peranak menua nya dikena belajarka lisin deriba Kelas E enggau ungkus sepenyampau RM69,600.

Tuju Sapit Menteri Pengawa Bekebun enggau Komoditi, Datuk Willie Monggin meri bantu tu ambika sida ke enda nemu macha, sida ke tinggal ba pengawa pelajar enggau orang ke kurang penatai pemisi ba sitak iya teulihka jalai pengidup ke baru.

Pia mega, bantu tu endang datai ari buah runding Willie ti mega nyadi Kaban Parlimen Puncak Borneo dikena mantu peranak menua nya ngambi lisin deriba.

Beserimbai enggau pengawa tu, iya bisi meri jaku tangkan ngagai bala penyereta program tu ambika sida iya bebendar agi ngiga jalai pengidup ke meruan dudi hari ila.

Pia mega bisi diatur ba program tu ensanus iya nya sebengkah licha bekaul enggau dokumen ke mesti dibai lebuh ngulu kus tu ila.

Ungkup penemu, program tu udah kala dilancharka Willie ba bulan April 2021 suba tang ketegal pengerekai igi penyakit Covid-19 sereta Atur Mindah Betagang (PKP) digaga, nya ngujungka program tu tejanggal.

Diumbaka mega, sekula endur belajar deriba maya nya ditutup magang ba selampur menua.

Sama datai enggau Willie ba program tu ensanus iya nya pengari ari Sekula Memandu MKM enggau Konsortium Memandu Kota Samarahan Sdn Bhd.

MANTU RAYAT..Willie (dua ari kiba) bejaku ba mua bala penyereta program tu kemari.

Suara Sarawak