SARATOK: Program Meri Darah ba Klinik Pengerai Nanga Budu deka dipejalai tiga bulan sekali udah tu.

Sapit Menteri Pengeluar Kuasa enggau Pengeraja Asal ke mega Kaban Parlimen Saratok, Datuk Ali Biju madah, batang tuju program nya dipejalai narak rayat sedarka pemesai guna bekal darah.

Ku iya, tuju bukai nentuka bekal darah ba klinik enggau Sepital Saratok semampai chukup kelebih agi maya bisi penusah ngenyit baka aksiden enggau beputung ti begunaka mayuh darah.

“Kitai sama nemu, mayuh orang enggai meri darah ngelama tu laban takut enggau enggai pedis lalu sekeda nangika diri luput lebuh meda darah.

“Tang kebendar, meri darah tu enda pedis, pedis agi ketup semada. Taja gamal jerumat dikena ngambi darah baka ke besai, tang enda bangat pedis munyi ku aku madah tadi.

“Kitai mesti pechayaka pengelandik enggau penau bala indu misi, derisa enggau staf perubat bukai ngereja pengawa sida, ngambi ati kitai berani enggau orang meri darah,” ku iya.

Ali nibarka jaku peransang nya lebuh ngabas pejalai Program Meri Darah ba Klinik Pengerai Nanga Budu ti diatur Sepital Saratok, empai lama.

Iya madah baru, pengawa meri darah mega manahka pengerai batang tubuh kitai laban sel darah baru deka nyadi dikena nyilih darah ti udah diberi kelimpah manahka pengerai runding.

“Kebuah aku nyebut manahka pengerai runding laban pengawa volunteer baka tu endang meri empas ngagai runding kitai, ati enggau runding kitai deka berasai lantang.

“Tu diasai udah kitai ngereja pengawa ti meri pemaik ngagai orang bukai, nyelamatka nyawa orang ti begunaka bekal darah, sema jaku, kitai mantu bala lutur, derisa enggau indu misi ngidupka seput orang,” ku iya madah nyemetak.

TERUSKA PENGAWA TI MANAH… Ali meri peransang ngagai bala ke bisi meri darah rambau program nya empai lama.

Suara Sarawak