KUCHING: Perintah Gempung Parti Sarawak (GPS) dikearap berundingka pengawa nyiri abis nadai siku senator ari komuniti Bidayuh.

Adun Mambong Datuk Dr Jerip Susil madah, kebuah pia laban diatu nadai senator ti dichiri ari raban bansa nya.

“Kami dekaka senator dichiri ari komuniti Bidayuh laban dalam sejarah Bidayuh, nadai siku dichiri nyadi senator,” ku Jerip.

Jerip mansutka jaku nya ba Pengawa Bejadika Aum Pengari Parti Pesaka Bumiputera Bersatu (PBB) Pampang Mambong ti dipenyadi Sapit Premier Datuk Amar Douglas Uggah Embas, ensanus.

Jerip ke mega Sapit Menteri Perengka Pengangkut madah, pekara nya entara resolusyen ti ditetapka selubang penemu ari semua 480 iku pengari ari 49 pati PBB pampang Mambong ke ngulu aum nya.

Pia mega, Jerip ke mega Tuai PBB Pampang Mambong madah, siku Sekretari Politik ba Opis Premier mega mesti dichiri ari kaban PBB Pampang Mambong.

“Nya peminta ari pengari lalu ngarapka pekara tu ulih diperunding dikena mantu kami gawaka rayat ba sitak Mambong,” ku iya nerang.

Ku iya, PBB Pampang Mambong ngembuan mayuh kaban ti bepenau ngemansangka menua.

Nya alai, iya ngarapka mayuh agi kaban PBB Pampang Mambong diangkat lebih agi ba renggat PBB.

PATUT DIPERUNDING… Jerip ngarapka Perintah GPS berundingka pengawa nyiri abis nadai siku senator ari komuniti Bidayuh.- GAMBAR RAMIDI SUBARI.

Suara Sarawak