BETONG: Peranak Rumah Seli Janting di Nanga Teru Baroh, Debak udah mujur ngatur sebengkah Program Pengelikun Rumah Panjai nengah kerejasama Balai Bomba enggau Penyah Penusah (BBP) Betong, ensanus.

Program ti diatur sehari nya bisi dipasuk 126 iku penyereta ti mega peranak rumah panjai tu dikena sida iya nyikap diri napi penusah ti enda disadang nyadi jemah ila.

Ku Tuai Rumah Seli, program nya diatur laban agi rawan sepengudah dituntung penusah ti kala nyadi ba rumah panjai sida iya kena 17 March tu tadi

“Ba bulan Mac tu empai lama, rumah panjai kami ditu nyau deka bebadi dituntung penusah angus rumah tang api mujur dipadamka nengah perengka pengerara api.

“Api ke nyadi mujur dirara ngena perengka pengerara api ti bisi dipenggi Komiti Pemansang enggau Pengelikun Genturung Pendiau (JKKK) rumah kami,” ku iya.

Ku iya, sepengudah nya sida iya serumah baum enggau JKKK deka minta ngaga siti program ti bisi ngangauka raban Bomba ari BBP Betong meri latih sereta licha.

“Nya alai, terima kasih ngagai Pemesai Bomba Betong PBK I Henry Jugah sereta raban Bomba ari BBP Betong ti udah meri licha enggau latih ti chukup beguna ungkup kami ke diau ba rumah panjai,” ku Seli.

Ungkup penemu, Rumah Panjai Seli di Nanga Teru Baruh tu udah digaga ba taun 1961 lalu agi meruan tegap nyentukka sehari tu.

Sama enggau Henry meri licha sereta latih tu iya nya PB Joshua Lang Rimong enggau PB Leo Chapu.

Sama bisi datai ngulu program tu mega iya nya Mandal Tuai Rumah Chabu Antau ti mega nyadi Ketuai Komiti Pengelikun rumah panjai sida iya sereta peranak menua nya.

BAKATU CHARA IYA…Raban Bomba ari BBP Betong benung ngajar peranak Rumah Seli Janting nguna perengka pengerara api 

Suara Sarawak