BEGAMBAR KENANG..Awang Morning bin Awang Dewa (kiba) enggau Philip Sung (kanan) begambar enggau pengembu bedil pesaka, ibu Dapew di Rumah Ado Bilong, Kakus.

BINTULU: Sebuah bedil pesaka ke diibun siku ibu bansa Punan ari rumah panjai Ado Bilong, Kakus sebengkah reta pesaka ke diturunka aki ini iya ari jeman pegai perintah Sultan Brunei kelia urung kurun ke-18 dalam taun 1701 nyentuk taun 1800.

Nitihka penerang ari pengempu bedil pesaka nya, ibu Dapew anak Bilong madahka bedil pesaka nya endang diturunka ari indai iya ke benama Bela anak Bitok ngagai iya empu.

“Bedil pesaka nya siti pemai tauka pemeri ba pengawa melah pinang ke diberi apai aku ke benama Bilong Keseng lebuh iya jadi enggau indai aku,” ku padah ibu Dapew.

“Bedil tu mega diturunka bala sida aki ini aku baka sida Saghek, Sega, Jingade ke idup ba jeman pegai perintah Sultan Brunei kelia sebedau diturunka ngagai apai aku,” ku padah ibu Dapew.

Bedil pesaka ke diibun ibu Dapew nya ngembuan cherita enggau sejarah kediri empu ti chukup ngalitka ati.

KERESA PESAKA…Bedil pesaka ari jeman pegai perintah Sultan Brunei ba kurun ke-17 enggau 18.

Kenu ku padah ibu Dapew, sebedau rumah panjai sida dituntung penusah angus ba taun 2008 suba, iya ngembuan siti pengingin ati ti kuat deka ngasuh bedil pesaka nya disimpan bala iya sebilik ba rumah sida siti agi.

“Enti enda pia, bedil pesaka nya tentu udah rusak tauka lenyau ba penusah angus nya tang laban ke udah disimpan ba rumah bukai sebedau penusah nya nyadi, nya kebuah bedil nya agi meruan nyentukka sehari tu,” kenu ku padah ibu Dapew.

Nangkanka nya, ibu Dapew madahka sekeda reta pesaka ke diturunka aki ini iya kelia nyengkaum sebuah guchi pesaka.

“Guchi pesaka tu keterubah iya suba diibun menyadi indu aku ke benama Kedo Bilong ke diau ba rumah panjai sida di Pandan, Kakus tang guchi nya dipelabaka lenyau ba taun 1989 suba ba sebengkah penusah angus ke nuntung rumah panjai nya.

“Berapa hari pengudah penusah angus nya, menyadi aku Kedo lalu bemimpi. Dalam mimpi iya, guchi nya minta ambi pulai baru.

“Lebuh Kedo mansang ngagai palan ke dipadah dalam mimpi nya, dia dih Kedo lalu tetemuka guchi ke dipelabaka lenyau sebedau tu ba seberai Sungai Kemena iya nya sepiak pasar mit Pandan,” kenu ku penerang ari ibu Dapew.

Ku tampung ibu Dapew, guchi nya lalu diserahka Kedo ngagai menyadi sida ke benama Ado Bilong ke nyadi tuai rumah ba rumah panjai Punan nya tang guchi nya lenyau ba penusah angus ke nuntung rumah panjai sida ba taun 2008 suba.

Ibu Dapew mega madahka mayuh reta pesaka sida ke bukai tang mayuh lenyau laban udah nyadika baya bala aki ini sida kelia sereta lenyau ba penusah angus ke nuntung rumah panjai sida.

Suara Sarawak