SERIAN: Bengkel Makmal Perambu enggau Pemansang ti diatur ditu dikeandal ulih bejalaika inisiatif ke meruan agi ungkup pelilih mit Balai Ringin.

Sapit Menteri Industri Kreatif enggau Seni Pemerindang, Datuk Snowdan Lawan madah, pengawa bekunsika penemu enggau perambu ari bemacham raban lebih agi tuai komuniti enggau ejensi perintah beguna amat dikena ngemansangka Balai Ringin.

“Tu mega sebuah program ke manah laban ari pengawa bekunsika penemu nya ulih nyungkak ekonomi tauka ngangkatka pemansang ba pelilih.

“Enti sema Balai Ringin maju agi, status nya ulih dipinta ngambi diangkat ngagai pelilih sama baka Pelilih Pantu, tu utai kedeka kitai,” ku Snowdan.

Snowdan mansutka jaku nya lebuh dirandau pemberita pengudah bejadika Pengawa Nutup Makmal Perambu enggau Pemansang Pelilih Mit Balai Ringin, Bagi Menua Serian di Function Hall, Opis Perintah Sarawak, ensanus.

Nengah bengkel tu mega, iya madahka bemacham pekara dikerandau nyengkaum infrastruktur, ekonomi, betanam betupi, telekomunikasyen enggau ke bukai ungkup pemaik komuniti.

Ku iya, program baka tu chukup manah ngambi mantaika perambu ari bemacham raban bekaul nentuka pelilih mit tu ulih mansang dudi hari.

Nangkan nya, Sapit Sekretari Perintah Sarawak (Transfomasyen Menua Pesisir), Datuk Ik Pahon Joyik mega madah, semua orang beempu tanggungpengawa nentuka pemansang lanchar dipejalai.

“Semua kitai beempu tanggungpengawa nentuka agenda pemansang Sarawak ulih dipejalai enggau lanchar.

“Kami ba renggat pengatur mesti bejalaika tanggungpengawa enggau nitihka atur ke udah ditetapka ngambi ngemujurka agenda perintah nyapai status menua maju manggai taun 2030,” ku Ik Pahon.

Kelimpah ari nya ku iya, tu mih tanggungpengawa nyadi pengereja perintah nentuka Balai Ringin ulih maju dudi hari sereta meri pemaik ngagai rayat.

BEJADI… Ari kiba Residen Serian Tuah Suni, Datuk Ik Pahon Joyik enggau Datuk Snowdan Lawan bejadika Pengawa Nutup Makmal Perambu enggau Pemansang Pelilih Mit Balai Ringin, Bagi Menua Serian di Function Hall, Opis Perintah Sarawak, ensanus.

Suara Sarawak