GENAP… Kereban dikena Annie bepenti, batu tungku, daun mambung enggau sirih enggau produk jamu digagaka kupi ti dijual iya empu. Diirup kena ngangatka tubuh begulai enggau ai lia sereta ai bisa.

TAJA jeman udah moden lalu jauh berubah diatu, dia chara lama lebuh bepenti pengudah beranak nyau mayuh udah dilengka.

Taja pia, ba Angela Anne empu, iya tetap milih chara lama ngintu enggau nyaga diri ti dikemeran sida ke tuai dulu.

Indai beranak tiga ti siru agi dikangau Anne madah, peneleba bepenti kenyau ari anak keterubah suba mayuh udah ngajar iya ngambi beratka pengerai dalam enggau luar tubuh.

“Enti kitai kur bepenti, ukai semina manahka pengerai tang mega ulih ngetanka pemanah raras tubuh kitai ke indu sereta ulih nyeliahka kitai ari kena benta ku ajar orang tuai.

“Nya alai aku endang mendingka utai diajar enggau dipadah sida ke tuai lebuh bepenti pengudah beranak taja berasai mar endar deka dititih laban mayuh endar utai enda tau tauka mali dikereja.

“Ketegal deka bepengerai enggau ngembuan raras tubuh seruran manah dipeda, aku nadai beleman, tak senurut aja utai diasuh orang tuai,” ku Anne ngepunka randau begulai enggau Suara Sarawak.

SEDIA TUMU

MENTAS… Entua Annie nulung iya ngaduka bengkung lebuh bekindu.

Anak kedua ari lima iku diri menyadi nya madah, kereban dikena bepenti mesti disedia dulu ngambi kitai enda kalat-kalat lebuh begunaka iya ila laban enti udah beranak, dia kitai mar deka mindah.

Ambika chunto ku iya, abis nadai kitai bisi bengkung, batu tungku, macham bansa herba kena mandi, diirup enggau diempa, ai bisa ungkup indu beranak enggau minyak angat sereta jamu.

“Munyi ku aku dulu tadi, kitai mesti nyendiaka diri tumu ke alai perambu mesti digaga tumu, enti ulih sebedau datai hari kitai beranak.

“Baka nya mega kereban enggau perengka dikena kitai ngintu diri pengudah beranak enda tau enda disediaka dulu, kira dua tauka tiga bulan sebedau beranak.

“Pemadu manah, minta tulung laki maya nuan bepenti kediri laban mayuh kitai diatu nyau diau sebelah mengeri nitihka periuk asi lalu enda ulih pulai ke menua ketegal jauh tauka ngelimat belanja.

“Ari nya tadi, mesti ka bisi kerejasama ari laki kitai mega awakka sekumbang kitai bepenti nya tadi, kitai enda kusut runding enggau mayuh pikir ti tau ngachau pengerai,” ku iya.

ENTUA SIRU

ADAT TUAI… Dulang dikena lebih tujuh serak tubuh lebuh mandika anak keterubah mandi ti digulai enggau batu penchelap.

Nampung randau ke ujung agi, peranak asal Lemanak di Engkilili nya madahka petua iya maya bepenti iya nya titihka aja chara tauka ajar orang tuai.

Baka Anne empu sekumbang bepenti beranakka anak ketiga diatu, dia iya berasai untung enggau benasip endar laban diibun enggau diintu entua indu ti chukup mentas sereta siru.

“Ukai ketegal indai diri empu enda mentas tauka enggai ngibun, tang laban iya empu benung kiruh nyaga enggau ngibun menyadi kami ti sama hari beranak enggau aku.

“Ari nya tadi, bala mayuh anang salah peragam laban indai enggau entua aku bela mentas, sama siru enggau sebaka pengiruh jam diatu, ngintu orang udah beranak.

“Untung enti nuan diintu diri sebilik maya bepenti, nya kebuah bala indai ke udah beranak mayuh milih pulai ke menua diri enti bisi peluang laban kitai nemu pemesai guna timpuh bepenti tu,” ku iya.

Nyau ngenang kisah iya ti bepenti diibun entua ku Anne, meda diri enda bepengerai, dia iya terundingka diri pulai ke menua laki taja perambu asal deka bepenti kediri di rumah ba mengeri.

“Puji Tuhan, abis beperesa kuning anak, indu misi datai ke rumah seminggu sekali, aku lalu mupuk pulai ke menua entua.

“Ku jaku ka bepenti kediri taja anak udah tiga. Dua anak aku diintu enggau diibun entua magang, nyentuk diatu, anak aku endang diibun iya.

“Datai ba menua, alu diintu entua enngau ukum jipun wai. Kipas? Anang nanya. Enda tau ditunga. Anak enda meh nunga kipas. Dalam perut nadai meh anak bekipas. Jaku tundi aja.

“Dani pagi? Pukul 6 pagi udah dani enda ulih laun. Mesti regas. Nyau kering agi asai tubuh.

“Negu ai chelap sigi enda tau sekali. Jauh ka bebasu ke sida gari semua. Aku endang muji pementas entua ngibun aku.

“Ukai dilagu. Indah masu chawat enggau kain ti dikena pan enda disagi iya. Nyerarat iya ensinat nganu aku megai ai.

“Maya malam, aku lelakak merangap tinduk, iya meh siku indai, ini enggau entua buntau nyaga anak aku.

“Aku nyau puntan runding maya ke nadai pengawa diau ba rumah laban teleba gawa bedagang ngapuska hari.

“Tu tak duduk jenuh nunga anak nama jam empai manggai pukul 12 tengahari, endang dipatau enda tau gali.

“Duduk? Enda tau mikah, enti unjur pan unjur manah. Enti duduk, duduk manah. Enti bejalai, bejalai manah.

“Empai disebut bepakaika ai lia, ngirup ai angat, ukai ai chelap tauka ai amat. Endang tak ai angat tuchi.

“Pia mega beiirupka ai bisa, beunsutka lia sebelah selepak tubuh, amat tak ka minjung asai, ka lari bisi meh. Diantika maya abis bepenti, nya enda ngutuk aku tu bajik udah abis bepenti ila.

“Main telefon? Bedagang? Anang tetungging main telefon, benta ila! Diatu enda meh ngasai, empat lima taun nya baru tebantai! Nya, endang ukum jipun terus sekali tu wai, enda alah laban perintah.

“Tang aku ngasaika semua nya datai ari penyiru enggau pementas entua aku. Terima kasih mak, nyaga aku baka nyaga anak diri. Nadai sampi bukai, arapka mak makin tuai makin bajik sereta gerai belama.

“Tu mih pengingat ti deka semampai dikenang aku lebuh bepenti pengudah lapan taun nadai kala ngasai,” ku iya lalu tuchum ngenang pengawa diri.

ADAT LAMA

NGELANCHARKA DARAH… Bekindu ba dapur kayu ngasuh tubuh berasai regas.

Annie madah, siti agi utai dipelajar ari entua iya, pasal Adat Meri Anak Mandi ke alai anak ke baru ada dipandi ba dulang nitihka ajar orang kelia.

“Pelaba aku, mayuh rebak diatu enda nemu tauka enda kala meda orang bejalaika adat tuai baka tu.

“Nyadi anak aku ke lumur tiga tu pan baka dua aka iya sebedau tu, diberi mandi ba dulang.

“Nyadi dulang dikena mandika anak keterubah mandi. Ai dalam dulang nya bi digulai enggau batu penchelap.

“Dulang dikena entua aku lebuh nya endang dulang kena mandika anak mit ke baru ada, manah agi maya terubah sida mandi.

“Nampung kenang sida ke tuai, lebih ari tujuh serak tubuh udah mandi ngena dulang nya,” ku Annie bekunsika jerita ditusui entua iya.

PETUA BEPENTI

Ngenang pasal chara dikena lebuh bepenti, baka orang bukai mega ku Anne, bekindu, betungku, bebaju panjai enggau ngena stukin enggaika tama angin sereta bepakaika jamu enggau ai herba udah masai ba iya.

Kala mega asai ‘dipejal’ lebuh bepenti nyaga diri, tang munyi ku iya tadi, naka ulih meransang enggau ngaum diri, baik timpuh bepantang enda lama, enda nya berasai deh, ku ati iya betelai.

“Enti nitih asai ati, bangat enggai aku tu ngirup ai herba enggau makai jamu, tau ngasuh nyawa anga, nemu jeluak. Baik agi enti disebutka bekindu enggau betungku ngena batu, berasai nyamai tubuh.

“Kelimpah ari nya, kitai mega mesti nyaga pemakai, ngintu diri enggau chukup awak endur belelak. Anang sesekali mayuh pikir ti tau ngasuh runding kusut maya bepenti.

“Maya tu mih peluang kitai indu ke udah beranak mulaika pemanah raras tubuh ngagai ke asal. Ari perati aku, mayuh bala indai enda berundingka utai tu, udah beranak, tubuh kitai endang 100 peratus berubah.

“Semua urat berubah. Nya kebuah kitai mayuh meda sereta ninga mayuh bala ke udah beranak sebanaka diri pedis isi, pedis tulang, datai kain enda meruan, hormone berubah, chelap isi, benta, pedis tumbit kak enggau mayuh pemedis bukai.

“Nya alai anang takut ngeluarka belanja enti nuan deka bepengerai. Anang udah pedis baru deka berubat. Ambika banding, bepakaika jamu. Mayuh orang madah jamu pait, enda nyamai.

“Tang sida enda nemu jeman diatu, mayuh jamu asal nyau udah digaga baru enggau diubah (moden) ngambi nyamai diempa baka Kopi Dara Lawwa, endang 100 peratus ari jamu tang ke udah digaga ngena chara baru.

“Enda ibuh kitai masau jam kitai kiruh nutuk enggau manduk jamu, semina irup aja ari pikit ke udah disedia. Asai kupi tu pan nyamai,” ku Annie seraya ngelakuka produk kupi pengerai ti keterubah ba Sarawak ngena chap dagang DeAngelz.

KOPI DARA LAWWA 

NYAGA PENGERAI… Set penuh kena Annie lebuh bepenti.Ngenang mimit pasal produk kopi enggi iya nya ku Annie, endang manahka pengerai dalam enggau luar tubuh orang indu ti nadai ngira umur sereta enda ngachau pengerai.

Iya madah, orang indu ti bisi penanggul datai kain enda lanchar enggau enda tetap, kelalu balat pedis maya datai kain, bisi pansut lendir tauka disebut orang ‘keputihan’ endang ditemu ngasi endar enti ngirup produk kopi nya.

“Mayuh kitai ke indu chukup irau enti laun tauka tumu datai kain ninting bulan lebih agi enti bisi ‘keputihan’ ti ngasuh kitai enda nyamai pendiau, enda nyamai asai lebuh begulai enggau orang.

“Pia mega sida ke bisi pedis pala tauka migraine enti ngirup kupi tau enda ibuh irau laban produk tu enda baka produk kupi bukai, enda ngasuh kitai pedis pala, asai iya mega chukup nyamai.

“Mayuh udah cherita dikunsi bala ti kala meli enggau nguji ngirup kupi tu madahka diri berasai nyamai, nadai pedis pala sereta maya datai kain pan lanchar, enda baka suba.

“Tu ukai jaku tempa laban mayuh udah orang ngasaika pengelantang udah ngirup produk Kopi Dara Lawwa tu,” ku Annie madah nyemetak.

JAGA PENGERAI KITAI

Iya ti ngentapka pendiau diri di Kuching ditu diatu ngelalau bala indu nadai ngira sida ke baru angkat dara tauka udah lunggar umur, mesti kur nyaga pengerai tubuh diri.

Annie mega madah, mayuh produk ti manahka pengerai orang indu ba makit tang mesti ka bejimat lebuh meli enggaika kitai tebelika produk tiru ti tau ngachau pengerai.

“Ngagai kitai ke bisi anak, menyadi enggau bakih indu, enti ulih ari sida berangkat dara udah diajar chara nyaga pengerai enggau pemanah raras tubuh ngambi sida tebalan.

“Nyaga tubuh kebendar pengudah kitai datai kain, berangkat dara kenu ku jaku siru sida ke tuai. Pemajik ukai dipeda ari luar aja tang ari dalam kitai mega. Anang nempaya ke diri,” ku iya nibarka jaku lalau.

Annie ti bekunsika kenang sekumbang lebih sebulan udah bepenti ba media rama ukai deka leluba tauka mandangka diri manah agi ari orang bukai tang niat iya ambika semua nemu lalu tau nunda petua tauka chara iya bepenti.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak