KUCHING: Anak dua iku melaki bini ke midang tegal tangkap karan di Cameron Highland empai lama ke udah bela nerima perati ari Pemangku Kepala Polis Sarawak enggau bini iya.

Pemangku Kepala Polis Sarawak, DCP Datuk Mancha Ata enggau bini iya ke mega Pemangku Chairperson Gerempung Ruang Bilik Polis (PERKEP), Datin Jennita William bisi datai ngabas tiga iku anak niang ba rumah sida di Kampung Sungai Tapang.

Ba penemuai nya, Mancha enggau bini iya bisi meri bantu ngagai tiga iku diri menyadi tu iya nya Elisa Olivia (10), Joseph Rayyan (8) enggau Magdalena (2).

Ba penemuai nya, Dato Mancha enggau bini iya enda muai peluang gaukka tiga iku anak niang enggau sida sebilik.

Nitihka penerang, tiga iku diri menyadi tu benung diibun siku agi aya sida ke mega siku pemesai polis ke gawa ba IPD Kuching ditu iya nya Sarjan Boss Kinchon.

Udah nya, Mancha enggau bini iya mega bela nemuai ngabas siku raban polis ke gawa ba Balai Polis Sentral Kuching, Sarjan Grete Nanang ke benung cuti sakit tegal sakit stroke.

Mancha enggau bini iya bela nyuaka bantu ngagai Sarjan Grete ba rumah iya di Puncak Borneo.

Bela ngulu penemuai nya Tuai Opis Pemansik Pengawa Salah Sarawak, SAC Tuan Lukas Aket enggau bini iya ke mega Tuai Biro Rama PERKEP Kontijen Sarawak, Lilin Gindip, Superintenden Koordinator IPK Sarawak, Superintenden James Jonathan, bala pegawai enggau raban PERKEP IPK Sarawak enggau IPD Padawan.

SINU…DCP Datuk Mancha Ata benung gaukka menyadi Elisa ke pemadu biak, Magdalena.

Suara Sarawak