TEPANTUP ATI… Asil dero ke diberi nama Ai Bekelala

NELSON Betie Gindie datai ari Rumah Rachak Nyalak Ladong, Pakan entara raban nembiak ke bisi penau seni kelebih agi nero.

“Aku minat nero kenyau ari mit laban tu mih alai aku mantupka ati kelebih agi maya lepa nadai pengawa dikereja.

“Ari nero tu mega, aku ulih mantaika mayuh pekara ti datai ari runding,” ku iya lebuh muka randau enggau Suara Sarawak.

NGANSAH PENGELANDIK

Nelson ti siru agi dikangau Betie ke diatu benung belajar ba UiTM Kampus Puncak Perdana madahka diri udah lama ngemeranka pengawa nero gambar.

Tang ku iya, pengelandik nero empai chukup diansah lalu ukai batang pengawa dikereja laban agi kiruh nembuka sekula ba tikas pelajar tinggi.

RANSING… Betie nyinuk lebuh nero

Iya madah, lebuh igi penyakit Covid-19 ngerekai lalu Atur Mindah Betagang (PKP) diterit suba, dia iya berengkah nero dikena ngisi maya lepa.

“Laban palan endur aku belajar ditutup maya PKP suba, aku nadai pengawa bukai, dia aku terunding deka ngiga pengawa ke menyana lalu ngujungka aku nero.

“Sepemanjai PKP nya mih aku ngansah pengelandik jari nero mayuh macham gambar sereta utai ti bisi dalam runding aku,” tusui iya.

Lebuh ditanya sapa ke meri peransang enggau sukung ngagai iya nero gambar, Betie madahka endang sida iya sebilik sereta bala bakih mih ke seruran meri sukung.

Kelimpah ari nya ku iya, sukung mega bisi datai ari bala bakih ba Facebook, Instagram enggau Tik Tok.

“Jaku positif enggau sampi semua sida ti nyadika peransang ngagai aku ngasuh ati ransing agi nero,” ku iya.

CHERITA GAMBAR

Betie mega madahka kereban dikena ngasilka sebengkah karya seni baka chat akrilik, chat pelaka, kimis, berus chat enggau drawing stand.

“Pemayuh utai udah didero aku, iya ke chukup ngemantupka ati aku, dero diberi nama Ai Bekelala ti mandangka gambar indu enggau lelaki.

“Cherita Ai Bekelala tu, aku nero gambar siku indu benung nyalin ai tuak pengelalu ngagai siku lelaki ti datai ngabang ba pengawa sida,” ku Betie nusuika cherita ba asil jari iya.

Betie mega nusuika iya teulihka runding nero gambar lebuh maya iya tepedaka siti utai digaga siku indu ba laman Facebook iya.

Ba dia ku iya, indu nya nero gambar siku indu ke bekenaka ngepan Iban lalu mayuh mega utai ti didero ke bukai.

Lebuh iya tepedaka utai didero indu nya, iya lalu tekait ati lalu berunding deka nero diumbaka endang minat nero taja bedau landik endar.

Betie mega bisi ngelansa baka ni chara iya teulihka buah runding lebuh maya iya deka nero sebengkah utai.

“Kemayuh utai ti udah didero aku endang datai ari peragam nengah runding aku empu pia mega bisi diambi aku ari gambar orang bukai mega.

“Ambika chunto, gambar orang bekenaka ngepan Iban endang digiga aku ba sebelah Facebook engga Google,” ku iya.

Kenang penuh ba Ruai 1 pagila

LANDIK NERO… Nelson Betie Gindi

 

MEMANAH… Entara asil dero Betie

Suara Sarawak