KUCHING: Sarawak deka berengkah meri dos pengalak Covid-19 kedua sehari tu (22 April).

Sapit Premier Sarawak, Datuk Amar Douglas Uggah Embas madah, bisi dua kategori penerima dos nya.

“Kategori keterubah nya sida ke beumur 60 taun enggau bisi penyakit lalu kedua sida ke bisi pemedis ‘imunocompromised’ beumur 12 taun enggau tuai ari nya,” ku iya nerang, ensanus.

Nambahka nya ku iya, vaksinasyen nya mega deka dipejalai ba semua Palan Vaksinasyen (PPV) nyengkaum di klinik pengerai, sepital peribit enggau klinik peribit.

Berebak enggau nya, Uggah ke mega Chairman Komiti Penyangga Penusah Nengeri Sarawak (JPBNS) minta sida ke deka nerima dos pengalak tau telefon ngagai palan vaksinasyen ngambi ngaga semaya.

“Sida ulih meda lumur telefon palan nya di Facebook rasmi Opis Pengerai Nengeri Sarawak,” ku Uggah.

Nambahka nya nyentuk 19 April tu tadi, Uggah madahka urung 1,879,748 iku tauka 91 peratus peranak beumur 18 taun enggau tuai ari nya udah nerima dos kedua.

“Urung 275,699 iku tauka 92.6 peratus nembiak beumur entara 12 ngagai 17 taun udah nerima dos nya.

“Sama mega, urung 84,677 iku tauka 38 peratus anak mit beumur lima ngagai 11 taun udah nerima dos keterubah sida,” ku iya nerang baru.

Uggah madah nyentuk 19 April tu tadi, 1,637,167 iku tauka 90 peratus rayat di menua tu udah nerima dos pengalak.

Nambahka nya, iya minta 181,589 iku agi ke apin nerima dos pengalak dipinta lengkas nerima dos nya.

Ungkup rikod, pagi ensanus Uggah mega nerima penemeuai basa ari Direktor Opis Pengerai Nengeri Sarawak baru, Dr. Ooi Choo Huck ba opis iya di Wisma Bapa Malaysia.

Kelimpah ari nya, Dr. Ooi Choo Huck mega dichiri mangku pengawa nya bepun 1 March tu tadi.
Iya udah 30 taun gawa nyadi Pakar Pengerai Mensia Mayuh di menua tu nukar ex-Direktor, Datuk Dr Mohamed Sapian Mohamed.

ENGGI NUAN… Uggah nyuaka tepa ngagai Dr. Ooi Choo Huck ba opis iya di Wisma Bapa Malaysia, ensanus.

Suara Sarawak