KUCHING: Konstitusyen Dun Mambong ke asal dipegai Parti Sa’ati Rayat Sarawak (SUPP) diatu dipegai Parti Pesaka Bumiputera Bersatu (PBB).

Adun Mambong, Datuk Dr Jerip Susil madah, pekara tu udah ditetapka Premier Sarawak ke mega Chairman Gempung Parti Sarawak (GPS) Datuk Patinggi Tan Sri Abang Johari Tun Openg pengudah Pengawa Bepilih Nengeri Ke-12 (PRN-12) ke udah ke alai PBB menang 47 penuduk nyengkaum Mambong.

“Dun Mambong diatu diempu PBB, nadai utai dikenangi,“ku iya nerang.

Jerip mansutka jaku nya pengudah bejadika penumbuh Pati Kampung Semadang, PBB N.19 Mambong di D’Redian, Kampung Semadang, kemari.

Berebak enggau nya, Jerip ke mega Sapit Menteri Perengka Pengangkut madah, SUPP nadai agi ngempu penuduk nya laban udah dipegai PBB.

“Endang amat sebedau PRN-12 mayuh penyarut nyadi ba sitak Dun Mambong, tang pengudah Premier Sarawak (Abang Johari) netapka Dun Mambong diarika PBB ke alai aku empu ke nyadi chalun.

“Pengudah mujur ngetanka penuduk nya, Premier ngaga pemutus Dun Mambong diempu PBB, nya kebuah SUPP enda ulih ngambu penuduk nya agi,” ku iya.

Nya kebuah, Dun Mambong, Dun Tarat enggau Dun Serembu di baruh Parlimen Puncak Borneo diatu diempu PBB, entara sebuah parti komponen enggau pemun ngagai GPS.

Sebedau tu, Dun Mambong nya aja konstitusyen dalam Parlimen Puncak Borneo diempu SUPP seraya Dun Tarat, Dun Serembu nyengkaum Parlimen Puncak Borneo nya diempu PBB.

Udah nya, Dun Mambong nyadi entara penuduk angat lebuh PRN-12 ke dulu pengudah chalun PBB bediri minta pilih ba penuduk asal SUPP nya.

Tu berindik ari Jerip masuk PBB pengudah ningkilka diri ari Parti Sarawak Bersatu (PSB) ke mega sebagi ari parti SUPP.

Jerip megai penuduk Dun Mambong kenyau ari PRN 2001 lebuh masuk SUPP lalu ditetapka nyadi chalun Barisan Nasional (BN) Sarawak ba PRN 2016 lebuh masuk Parti Rakyat Bersatu (UPP) ke diatu dikumbai PSB.

Jerip udah nya mujur ngetanka penuduk Dun Mambong enggau majoriti 3,071 undi pengudah bulih 5,865 undi bepadanlima penjuru di Dun Mambong.

Iya mujur ngalahka chalun PSB, Sanjan Daik ke bulih 2,794 undi, chalun Parti Tindakan Demokratik (DAP) Chang Hon Hiung bulih 1,517 undi seraya Joshua Roman ari Parti Bumi Kenyalang (PBK) bulih 958 undi enggau chalun Aspirasi, Chong Siew Hung bulih 144 undi.

Suara Sarawak