Ensera Imbul seduai Kiah : Beniat, bepinta nunga Telaga Kumang
Miring sebagi ari chara minta ngenataika juluk ati tauka peminta ngagai

>>Tusun 1
Dulu kelia, maya menua apin bangat mayuh iga mensia nguan, maya kampung agi jerung, babas apin nyadi keranggas, dia deh bisi dua iku orang melaki bini diau ba rumah sebuah enda jauh bendar ba puak kampung puang din. Laki iya penama Imbul lalu bini iya penama Kiah.

Nama menua endur seduai nya berumah nya, ku jaku tuai dikumbai orang Sungai Teritis Ai Manis baka beris Ujan Sehari, di Lempa Pasir Ngua Wuan Aka Batu Penguji.

Nyadi ku ensera sida niang ini aku menya, seduai melaki bini nya agi kelia menya endang sama serumah enggau sida Keling, sida Bunga Nuing, sama begulai enggau sida Ngelai sida Simpurai. Sida sama segempung enggau sida Tutung seduai Sanggul Labung, sama beapit-apit enggau sida Apai Sabit Bekait seduai Anchung Selung Bebelit. Sida sama semenua enggau sida Simpungga enggau sida Balu Gawa. Lebuh maya nya kelia menya, sida endang agi berimbai ruai, agi segulai sama sejalai, sama setangkai.

Udah nya, nyau kelama sida udah begulai sejalai, dia deh sida bisi pengachau, bisi pengirau. Sida belaya enggau pangan diri ketegal berebutka pengaruh pesaka tuai ke ulih aki ini sida kelia. Sida belaya enggau Apai Sabit Bekait berebutka pengaruh batu pengait mesai lilit labung kanggan. Nya alai Apai Sabit Bekait lalu pulai ke tisau langit bekuta rapit baka tambit pintu belulang.

Pendiau rampa sungai ke disema sebaka enggau pemanah pendiau Telaga Kumang.

Bisi sekeda belaya enggau Keling Gerasi Nading Bujang Berani Kempang, Jelingau Kai Betugau Mayuh Rambang. Sida belaya berebutka pegaruh taring tengiling tau ambika aning simpai lengan.

Nya alai mindah ga Keling lalu mai bala iya berumah ba Tinting Panggau Libau Lendat Dibiau Takang Isang, di Tuchung Engkeranji Padi Richah Rami Munyi Bala Pengabang.

Nyadi Tutung seduai Ngelai matak nembiak berumah di Gelung Batu Nakung, Nyingit Nyinggung Sampang Benang. Mayuh ga orang nitih seduai, nya alai rumah seduai pan panjai bendar ga. Enti nitihka dalam ensera, rumah panjai enggi sida bulih sehari tajai terebai ngakak ngelayang; rumah pandak enggi sida puting sesetak nyilup remang.

Nyadi beduduk ari ke bisi penyarut pasal pengaruh nya tadi, pendiau bala sida nyau jauh ngejang ari pangan. Mayuh bendar sida ke enda nemu alai pendiau pangan agi.

Kelebih agi bala sida ke nyau diau dalam kampung puang, endang nadai nemu riap orang agi. Mayuh bala sida ke diau ba kampung dalam nyau nadai betemu enggau pangan diri agi sampai ngagai dua tiga taun pengelama enda bepeda. Tang suah agi sida mina bisi tetemuka bekau pangan diri aja.

Nyadi utai ke selalu didinga sida dalam kampung nya mina nyawa jelu enggau burung aja, lebuh ke bejalai kin kitu. Nyawa ke semampai didinga baka nyawa Enggang, nyawa Kenyalang, nyawa Tajai, nyawa Ruai, nyawa Sengayan, nyawa Sempidan sereta enggau nyawa burung bukai ke bekekahka buah kayu.

Kala ga ninga nyawa Kera nyawa Nyumbuh. Bisi ga hari ninga nyawa Remaung Ke Negung Mua Lubang, lalu enti malam bisi ka kala ninga nyawa Gerasi Tuk Tuie, nyawa Antu Ngasu Bebulu Bauh Dada, Antu Besai ke Bejalai Besangga Nyawa.

Nyadi maya nya menya, semua anak lelaki ke baru ngangkatka diri bujang endang semua sida ke benung bujang raya balat endar bepekit belabanka pengelandik nyumpit. Sida besemekihka diri jelai agi kesuh laja ari enggi pangan diri.

Lalu ukai semina naka nya, sida mega bepekit ngaga ipuh ke bisa awakka iya balat jampat agi munuh ari enggi pangan. Sida ke bepekit nya tadi nadai kala mai ati jai enggau pangan, tang endang tak bepekit nyabung pengelandik, nyabung penemu enggau penauu. Sida iya nadai nguji ngelaban pangan ngena akal ke enda rurus, laban nya ku sida ukai pengelandik.

Beduduk ari nya meh chukup jauh kerekai pechah pendiau, laban sida ngiga endur ti manah, kelebih ari alai beridup, alai bumai alai betaun. Sida mula berimba, bepungkalka menua laban enda ulih enda bakanya, ketegal keran beridup, keran mungkal pengidup baru.

Nyadi mulai ngagai seduai melaki bini dulu tadi, iya nya Imbul seduai Kiah ti sama pechah ari rumah nya tadi lalu pindah ngentak rumah ba tengah-tengah emperan ba puak kampung puang din. Menua nya dikelingi madang buah mayuh macham, lalu sida nya endang enda kala ngelaung taun bebuah.

Nyadi jelu enggau burung anang ditanya, ukai utai disebut nama agi bisi, tang endang agi mayuh sereta mudah diulihka. Nya alai menua nya endang selalu ditepat orang alai begiga ka jelu, alai berikan enggau nyumpit burung.
Jalai sida ngulih ka burung nya ngena panjuk betali penduk, bisi ga ulih sida nyempulut enggau nyelidik. Nyadi jalai sida ngulihka jelu nya ngena bubung, ngena pencharan, bisi mega disumpit sida ngena laja ipuh. Bala sida ngulihka ikan ngena kail betali tenggang, bisi ga naan bubu ba ai sungai ke besai sereta naan ensenga ba sungai ke mit agi, ke teman ensenga.

Nitih ensera, seduai melaki bini nyau kelama-lama ke begulai ngidupka diri ba menua baru bulih endar bumai betaun sereta amat lantang ba jalai pengidup. Nya alai dalam jalai pengidup seduai asai ka nadai pungkang nadai kurang, tang semina utai ke dikenadai seduai ngasuh kelalu seilu-ilu nya ketegal nadai anak nadai telesak.
Lemai siti Imbul seduai bini iya mutuska runding deka beniat, minta kasih ngagai Petara.

“Manah tua mai piring ngagai tuchung bukit. Din ila tua besampi minta kasih ari Petara nyangka ukur iya ulih meri tua anak, meri telesak,” ku Imbul madah ngagai bini iya.

Ninga nya, Kiah pan sama selubang penemu. Hari siti, endang agi tumu endar pagi nya iya udah berengkah ngaga piring. Udah sedia piring seduai lalu mupuk nurun ngagai bukit ti numbas penyauh. Bukit nya endang pegari nama alai orang bepinta, beniat.

Agi kelia, mayuh mega orang ke nampuk beniat ba bukit nya betemu enggau Petara nyerupa, lalu sekeda betemu enggau Petara dalam mimpi. Bisi mega sekeda nadai mimpi tang nemu diri bisi bulih utai diniat dudi ari nya.
Di tuchung bukit nya bisi telaga tiga iti berimbai-rimbai enggau pangan. Telaga nya nadai kala langkang. Nyadi siti ke ari kanan nya jalai niki ngagai tuchung, nya telaga pemandi Kumang ti dikumbai Telaga Kumang. Iya ke tengah nya telaga pemandi Simpandai. Iya ke ari ili nya telaga pemandi Raja Tuah.

Kumang ari Gelung mandi ngagai telaga iya nya sekali dalam sebulan lebuh maya bulan di langit benung peranama nyentuk. Simpandai ke tau ngaga kitai mandi ga kia sekali dalam tiga bulan lebuh maya baru tumbuh anak bulan. Raja Tuah mandi ngagai telaga iya sekali dalam setaun, iya nya lebuh bala anak mensia baru deka ngengkah ka diri bumai, lebuh maya bintang tiga enggau bintang banyak baru udah ayan ari tisau langit.

Nitihka jerita dalam ensera sida niang ini menya, udah iya mandi, tubuh Raja Tuah lalu bebali perenching, lalu tubuh iya nya meh ke perenching mandang dunya. Ari nya orang ke dalam dunya tau nyambut jereki enggau tuah ari iya.

Nyadi Simpandai lebuh iya mandi dia berunsut ngena batu kupak kulit kayu melaban. Nya alai laban nya meh kebuah iya enda tau belinsur tuai. Lalu bakanya meh tubuh iya jauh bendar bebali biak lebuh iya udah pulai mandi ba telaga iya nya.

Ku penemu orang, kayu melaban selalu beganti kulit, lalu bakanya ga mensia dalam dunya tu sebarang sapa ke bisi ngembuan batu kupak umbang melaban sigi mali belinsur tuai. Amat meh umur sida iya tau tuai, tang tubuh enggau ati sida lubah bendar belinsur tuai.

Nyadi Kumang ti iya udah mandi ba telaga nya, tubuh iya lalu bebali manah, lalu dipuji orang enggau jaku sema: “Naka ga pemajik nuan ngenjing baka Kumang.”

Mulai ngagai Imbul seduai Kiah nya tadi, udah seduai datai di tuchung bukit, lalu ngengkahka ma seduai. Seduai lalu ngaga pelasar alai duduk. Udah nya Imbul lalu ngaga para alai engkah piring. Lebuh utai nya sedia magang seduai lalu nyampi nitih sampi orang beniat. Endur seduai ti nyampi nya betunga enggau adap Telaga Kumang.
Leka sampi enggau penembu ensera tu deka ditampung dudi ila.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak